အင်္ဂလိပ်စာရေးဆရာ ဆာအာသာကိုနန်ဒွိုင်းရဲ့ စုံထောက်ကြီး ရှားလော့ဟုမ်းနဲ့ ဒေါက်တာဝပ်ဆန်တို့ ဇာတ်လမ်းဟာ ကမ္ဘာကျော် စုံထောက်ဝတ္ထုတွေပါ။ အောင်မြင်ကျော်ကြားခဲ့တဲ့ အဲဒီဇာတ်လမ်းတွေကို ရုပ်ရှင်အဖြစ်လည်း တင်ဆက်ခဲ့ကြဖူးပါတယ်။ ရှားလော့ဟုမ်းအကြောင်း ရိုက်တဲ့ ရုပ်ရှင်တွေထဲမှာ လူကြိုက်အများဆုံးက ဘီဘီစီက ရိုက်တဲ့ Sherlock ဇာတ်လမ်းတွဲပါပဲ။

စုစုပေါင်း အပိုင်း ၁၃ ပိုင်းရှိတဲ့ Sherlock ဇာတ်လမ်းတွဲကို ၂၀၁၀ ကနေ ၂၀၁၇ အထိ ရိုက်ကူးထုတ်လွှင့်ပြသခဲ့ပါတယ်။ စုံထောက်ကြီး ရှားလော့ဟုမ်းနေရာကနေ Benedict Cumberbatch က သရုပ်ဆောင်ပြီး ဒေါက်တာဝပ်ဆန်နေရာက Martin Freeman က ပါဝင်ထားပါတယ်။ ကြည့်ဖူးသလောက် ရှားလော့ ရုပ်ရှင်တွေထဲမှာတော့ ဒီ ၂ ယောက်ဟာ ဒီ ကာရိုက်တာတွေနဲ့ အလိုက်ဆုံးပါ။ အပေးအယူလည်း မျှတာကြောင့် ၂ ယောက်လုံးလည်း သရုပ်ဆောင်ထူးချွန်ဆုတွေ အများကြီး ရခဲ့ကြပါတယ်။

ဒီနေ့ဟာ ရှားလော့ နောက်ဆုံးအပိုင်းထွက်တာ ၅ နှစ်ပြည့်ခဲ့ပြီမို့ ပရိသတ်တွေက အပိုင်းသစ်ကို မျှော်နေကြပါတယ်။ ဒါပေမဲ့ ရုပ်ရှင်ထုတ်လုပ်ရေးဘက်ကတော့ ခုထိ ထပ်ရိုက်ဖို့ အစီအစဥ် မရှိသေးဘူးလို့ သိရပါတယ်။ လွမ်းလောက်စရာပါပဲ။ Benedict ရဲ့ ရုပ်ရည်သွင်ပြင်ဟာ ဇီဇာကြောင်တဲ့ လူတော်ကြီး ရှားလော့နဲ့ တစ်ထပ်တည်း ဖြစ်နေပြီး Martin က လည်း သဘောကောင်းကောင်း အူကြောင်ကြောင် လူကလေး တစ်ယောက်နဲ့ တကယ်တူပါတယ်။ သူတို့ ၂ ယောက်အတူတွဲပြီး အမှုတွေ ဖြေရှင်းတာ ကြည့်ချင်လှပါပြီ။ အပိုင်းသစ် မထွက်သေးတော့လည်း ထွက်ပြီးသား အပိုင်းတွေ ပြန်ကြည့်ရင်း အလွမ်းဖြေလိုက်ကြပါရှင်။