အကယ်ဒမီ မင်းသားချောကြီး လွင်မိုးရဲ့သမီးလေးဖြစ်တဲ့ ယွန်းဝတီလွင်မိုးကတော့ သာယာ‌ချမ်းမြေ့ဖွယ် မိသားစုဘဝလေးကို တည်ထောင်ထားတာဖြစ်ပြီး ချစ်စရာသားငယ်လေးတစ်ယောက်ကိုလည်း ပိုင်ဆိုင်နေပြီ ဖြစ်ပါတယ်။ ယွန်းဝတီလွင်မိုးရဲ့သားလေး လွင်ထက် (ခေါ်) Liamလေးဟာ လုံးလုံးကစ်ကစ်လေးနဲ့ အသည်းယားစရာကောင်းအောင် ချစ်မွှေးပါသူလေးပါ။

ယွန်းဝတီလွင်မိုးကတော့အခုလက်ရှိမှာဆိုရင် ခင်ပွန်းဖြစ်သူနဲ့အတူ ဩစတြေးလျမှာ ပညာသင်ကြားနေတာ ဖြစ်ပါတယ်။ ယွန်းဝတီလွင်မိုးကတော့ မကြာသေးခင်က သူမရဲ့ Instagram လူမှုကွန်ရက်တွင် သတင်းလေးတစ်ခု ဝေမျှပေးလာခဲ့တာ ဖြစ်ပါတယ်။

ဒါကတော့ ဆိုးရွားလှတဲ့ ကိုဗစ်ရောဂါကူးစက်မှုကြောင့် အရေးပေါ်အခန်းထဲမှာ ဆေးကုသမှုခံယူခဲ့ရတာ ဖြစ်ပါတယ်။ “Covid-19 ရောဂါပိုးကူးစက်ခံခဲ့ရပြီး သုံးရက်မြောက်နေ့မှာပဲ အရေးပေါ်ရောက်တဲ့အထိဖြစ်ခဲ့တယ်။ အိပ်ယာထဲတစ်ပတ်ကျော်ကြာ အနားယူခဲ့ရပြီး အခုဆိုရင် ကျွန်မမှာ ရောဂါပိုးကင်းစင်ပြီး Negative ဖြစ်သွားပါပြီ” လို့ သူမရဲ့ လူမှုကွန်ယက် စာမျက်နှာကနေ ပြောလာခဲ့တာပဲဖြစ်ပါတယ်။

ပြည်ပနိုင်ငံတွေမှာလည်း ကိုဗစ်မျိုးကွဲသစ်ဖြစ်တဲ့ အိုမီခရွန်ပိုးဟာ ပြန့်နှံ့နေဆဲ ဖြစ်တာကြောင့် ယွန်းဝတီလွင်မိုးကို ပရိသတ်တွေက စိတ်ပူနေကြတာလည်း ဖြစ်ပါတယ်။ ယွန်းဝတီလွင်မိုးလေးတစ်ယောက် လက်ရှိ ခံစားနေရတဲ့ နောက်ဆက်တွဲ ဝေဒနာတွေ အမြန်ဆုံး သက်သာပျောက်ကင်းပါစေ။

Source: Yun Waddy's Facebook Acc