ကောင်းမွန်လှပပြီး ပြင်းထန်လွန်းတဲ့ ဖရီးကစ်ခြေစွမ်းတွေကြောင့် ပရိတ်သတ်ရင်ထဲ မေ့မရနိုင်တော့အောင် နေရာယူထားပြီးသား ဘောလုံးအားကစားသမားကြီးလို့ဆိုလာရင်တော့ အများက သိကြတဲ့ ဒေးဗစ်ဘက်ခမ်းကိုပဲ ဖော်ပြရမှာပါပဲ။သူဟာ (၁၉၈၇) ခုနှစ်မှစတင်ကာ ဘောလုံးလောကထဲကို စတင်ဝင်ရောက်လာခဲ့တာဖြစ်ပြီး (၂၀၁၃)ခုနှစ်မှာတော့ အနားယူသွားခဲ့ပြီဖြစ်ပါတယ်။
သူဟာ (၁၉၉၉)ခုနှစ်မှာ အဆိုတော်တစ်ဦးဖြစ်တဲ့ ဗစ်တိုးရီးယားဘက်ခမ်းနှင့်လက်ထပ်ခဲ့ပြီး လက်ရှိမှာ သားသမီး(၄)ဦးထွန်းကားခဲ့တာပဲဖြစ်ပါတယ်။ဘောလုံးသမားဘဝကနေအနားယူပြီးနောက်မှာတော့ သူဟာ မိသားစုနှင့်အချိန်အတူကုန်ဆုံးစေကာ ဘဝကိုဖြတ်သန်းနေတာပဲဖြစ်ပါတယ်။ ယခုလည်း သူ့ရဲ့ သမီးအငယ်ဆုံးလေးနဲ့ အတူတူဆော့ကစားနေရာမှ ဖြစ်ပေါ်လာတဲ့ အကြောင်းအရာအချို့ကိုဝေမျှလာခဲ့တာဖြစ်ပါတယ်။
သူဟာ သူ့ရဲ့ (၁၀)နှစ်အရွယ်ရှိတဲ့ သမီးလေးကို ကလိထိုးဆော့မြှူနေခဲ့ရင်း သူ့ရဲ့ နှာခေါင်းမှာ ဒဏ်ရာရရှိလာခဲ့တဲ့အကြောင်းကို ဟာသအမြင်ဖြင့် ဖော်ပြလာခဲ့တာဖြစ်ပါတယ်။သူရေးထားတာကတော့ “ကိုယ့်ကိုကို သတိပေးချက် : သမီးနဲ့ ကစားနေတုန်း ကိုယ့်ရဲ့နှာခေါင်းကို သူ့ပါးစပ်နားမှာ မထားမိစေရန်” ဆိုပြီးရေးသားခဲ့တာဖြစ်ပါတယ်။ ပရိတ်သတ်တွေအနေနဲ့လည်း အစကတော့ ဒေးဗစ်ဘက်ခမ်းရဲ့ ဒဏ်ရာကြောင့် စိတ်ပူသွားခဲ့ကြပေမယ့် ဒီစာသားကို မြင်လိုက်ရတဲ့အခါမှာတော့ သဘောကျရယ်မောနေခဲ့ကြတာပဲဖြစ်ပါတယ်။