၂၀၂၁ ခုနှစ်အတွက် ကမ္ဘာ့အချောဆုံး အမျိုးသား ၁၀၀ ဆန်ကာတင်စာရင်းမှာ ပါဝင်ခဲ့တဲ့ပိုင်တံခွန်

အားလုံးသိပြီးသားဖြစ်တဲ့ မင်းသားပိုင်တံခွန်ကတော့ အရှေ့တောင်အာရှသားရုပ်ရည်မျိုးကိုပိုင်ဆိုင်ထားပေမဲ့ ဟောင်ကောင်ရဲ့ အောင်မြင်ငယ်ရွယ်တဲ့ CEO လိုမျိုး၊အရိုင်းဆန်ဆန်ကြည့်ကောင်းတဲ့ ဂျပန်လူမျိုး Model လိုမျိုး၊ကိုရီးယားရဲ့ ချောမောတဲ့ မင်းသားရုပ်ရည်မျိုး အစရှိတဲ့ အမျိုးမျိုးဆွဲဆောင်မှုရှိတဲ့ မျက်နှာဖုံးတွေကို ပိုင်ဆိုင်တဲ့ မင်းသားတစ်လက်လည်းဖြစ်ပါတယ်။

သရုပ်ဆောင် ပိုင်တံခွန်ဟာ TC calendar entertainment က ထုတ်ပြန်တဲ့ ၂၀၂၁ ခုနှစ်အတွက် ကမ္ဘာအချောဆုံး အမျိုးသား ၁၀၀ ဆန်ကာတင်စာရင်းမှာ ပါဝင်လာခဲ့ပါတယ်။

ကမ္ဘာနာမည်ကျော် 100 Most Handsome Faces List ကို TC Calendar နဲ့ The Independent Critics တို့က ၁၉၉၀ ပြည့်နှစ်ကတည်းက စတင်ဖော်ပြလာတာပဲ ဖြစ်ပါတယ်။

TC calendar Entertainment ဟာ နှစ်စဥ်နှစ်တိုင်း ကမ္ဘာ့အချောဆုံးမျက်နှာပိုင်ရှင် အမျိုးသားနဲ့ အမျိုးသမီးစာရင်းကို သူတို့ရဲ့ Instagram ကနေ ထုတ်ပြန်ကြေညာလျက်ရှိပါတယ်။

သရုပ်ဆောင် ပိုင်တံခွန်ဟာ ၂၀၂၀ ခုနှစ်တုန်းကလည်း  ကမ္ဘာအချောဆုံး အမျိုးသား ၁၀၀ ဆန်ကာတင်ထဲမှာလည်း ပါဝင်ခဲ့ပြီးနှစ်နှစ်ဆက်တိုက် ပါဝင်ခဲ့တဲ့မြန်မာနိုင်ငံက အနုပညာရှင်တစ်ဦးလည်း ဖြစ်ပါတယ်။

ပိုင်တံခွန်ဟာ ဖေဖော်ဝါရီလကနေစပြီး ပြည်သူတွေနဲ့အတူ တစ်သားတည်းရပ်တည်ပြီး လူထုလှုပ်ရှားရေးတွေမှာ တက်တက်ကြွကြွပါဝင်ခဲ့တာကြောင့် ၅၀၅ ကနဲ့တရားစွဲခံထားရပြီး အင်းစိန်အကျဥ်းထောင်မှာ ထိန်းသိမ်းခံထားရတဲ့ အနုပညာရှင်တစ်ဦးလည်း ဖြစ်ပါတယ်။