ဂျင်းနီဟာ တစ်ကိုယ်တော်အဆိုတော်ဖြစ်တဲ့ ဇီကိုရဲ့ ပွဲဦးထွက်ဆယ်နှစ်ပြည့်အယ်လ်ဘမ်မှာ ပါဝင်သွားမှာဖြစ်ပါတယ်။ မီဒီယာတွေရဲ့ စုံစမ်းချက်အရ ဂျင်းနီဟာသီချင်းဆိုတဲ့နေရာမှာပါဝင်ရုံတင်မကဘဲ သီချင်းဗီဒီယိုမှာပါ ပါဝင်ရိုက်ကူးထားတယ်လို့သိရပါတယ်။ 

ဂျင်းနီနှင့်ဇီကိုတို့ဟာ ပရိတ်သတ်တွေရှေ့မှာ အတူတွဲတွေ့ဖူးတာမျိုးမရှိပေမဲ့ အတော်လေးခင်မင်နေတဲ့သူငယ်ချင်းတွေဖြစ်တယ်လို့သိရပါတယ်။ သီချင်းအသစ်ထုတ်ဖို့အတွက် ဇီကိုဟာဂျင်းနီကိုအတူလုပ်ဆောင်ဖို့တောင်းဆိုခဲ့တာဖြစ်ပြီး ဂျင်းနီကိုယ်တိုင်ကလည်းတောင်းဆိုချက်ကိုချက်ချင်းပဲလက်ခံခဲ့တာဖြစ်တယ်လို့သိရပါတယ်။ နှစ်ယောက်သားဟာ မကြာသေးခင်က Chanel ရဲ့ပွဲတစ်ခုမှာလည်း တွေ့ခဲ့ကြပါသေးတယ်။

လက်ရှိအချိန် ဂျင်းနီဟာတစ်ကိုယ်တော်အယ်လ်ဘမ်ကိုပြင်ဆင်နေတာဖြစ်ပြီးတော့ တစ်ခြားတစ်ကိုယ်တော်အလုပ်တွေကိုလည်း အများကြီးလုပ်ဆောင်နေတာဖြစ်ပါတယ်။ BlackPink အဖွဲ့အနေနှင့်လည်း Comeback လုပ်ဖို့ကြေညာထားတာကြောင့် ဂျင်းနီအတွက်တော့အတော်လေးအလုပ်များနေမယ့်အချိန်ဖြစ်ပါတယ်။ ဂျင်းနီဟာ ပွဲဦးမထွက်ခင်တုန်းက ကုမ္မဏီတူစီနီယာဖြစ်တဲ့  G Dragon ရဲ့သီချင်းမှာလည်း ပါဝင်သီဆိုခဲ့ဖူးပါတယ်။