တောင်ကိုရီးယားဘောလုံးကစားသမား Park Joo Ho ဟာ ဇွန်လ (၆) ရက်နေ့က သူ့ရဲ့ကစားသမားဘဝနှုတ်ဆက်ပွဲကို Suwon Sports Complex မှာ ကျင်းပခဲ့ပါတယ်။သူ့ရဲ့နောက်ဆုံးပွဲမတိုင်ခင် ကျင်းပခဲ့တာဖြစ်ပြီး မိသားစုဝင်တွေနဲ့ ပရိသတ်များစွာ တက်ရောက်ဂုဏ်ပြုခဲ့ကြပါတယ်။

Park Joo Ho ရဲ့ မိသားစုနဲ့အတူ Suwon ကစားသမားတွေဟာ Park Joo Ho ကို ဂုဏ်ပြုတဲ့ အင်္ကျီတွေကို ဝတ်ဆင်ပြီး တက်ရောက်ခဲ့ကြပါတယ်။သူတို့ရဲ့ တီရှပ်တွေပေါ်မှာ `` ကျေးဇူးတင်ပါတယ် Park Joo Ho ‘’ ဆိုတဲ့ စာတန်းနဲ့အတူ Park Joo Ho ရဲ့ ဓာတ်ပုံတစ်ပုံ ပါရှိတာပဲ ဖြစ်ပြီး သူတို့ကစားသမားကို သေချာဂုဏ်ပြုနှုတ်ဆက်ခဲ့ကြပါတယ်။

ပရိသတ်တွေဟာ Park Joo Ho ကို လက်ခုပ်ဩဘာပေးကာ ဂုဏ်ပြုပေးခဲ့တာကို တွေ့ခဲ့ရပါတယ်။ပွဲအပြီးမှာ Park Joo Ho ရဲ့ ဇနီး Anna Park ဟာ ပရိသတ်တွေ မျက်ရည်ကျစေမယ့် အရာတစ်ခုကို ပြုလုပ်ခဲ့ပါတယ်။Anna Park ဟာ ပရိသတ်တွေရှိတဲ့ ဘက်ကိုသွားပြီး ဦးညွှတ်ကာ အလေးအနက်ကျေးဇူးတင်ကြောင်း ပြသခဲ့ပါတယ်။

ပရိသတ်တွေကလည်း သူမရဲ့လုပ်ရပ်ကို မြင်ပြီး စိတ်မကောင်းဖြစ်ခဲ့ကြပေမယ့် ဂုဏ်ပြုပေးခဲ့ကြပါတယ်။Anna Park ဟာ ကင်ဆာရောဂါခံစားနေရတာ ဖြစ်ပြီး အနည်းငယ်သက်သာလာပေမယ့် ခင်ပွန်းဖြစ်သူက ပြုစုစောင့်ရှောက်ပေးချင်တာကြောင့် အခုလို ကစားသမားဘဝက အနားယူခဲ့တာ ဖြစ်ပါတယ်။

Photos : Credit