ဘောလိဝုဒ်ရုပ်ရှင် လောကကို ထပ်မံကယ်တင်ခဲ့ပြန်တဲ့ မင်းသားကြီး ရှာရွတ်ခမ်း

King Of Bollywood လို့တင်စားခြင်းခံရတဲ့ မင်းသားကြီး ရှာရွတ်ခမ်းဟာ အခုအချိန်မှာလည်း ဘောလိဝုဒ်ရုပ်ရှင်လောကကို ထပ်မံကယ်တင်ခဲ့ပါတယ်။အိန္ဒိယရဲ့ ကြေးအကြီးဆုံးမင်းသားဖြစ်တဲ့ ရှာရွတ်ခမ်းဟာ ဘောလိဝုဒ်ရုပ်ရှင်လောက ဟာ မှေးမှိန်လာပြီဆိုတဲ့ စကားတွေအားလုံးကို တိတ်ဆိတ်စေခဲ့ပါတယ်။

အကြောင်းမှာ ရှာရွတ်ခမ်းရဲ့ ဇာတ်ကားအသစ်ဖြစ်တဲ့ Pathaan ရုပ်ရှင်ဟာ အောင်မြင်မှုကြီးကြီးမားမား ရရှိနေပြီဖြစ်ပြီး ရုံတင်ငွေအိန္ဒိယရူပီး ကုဋေတစ်ရာကျော်ရရှိနေတာကြောင့် ဖြစ်ပါတယ်။ ဇန်နဝါရီ (၂၅) ရက်နေ့ကမှ စတင်ပြသခဲ့တဲ့ ရှာရွတ်ခမ်းရဲ့ အက်ရှင်ဇာတ်ကားဖြစ်တဲ့ Pathaan ဟာ ရုံတင်ရက်ဒုတိယမြောက်နေ့မှာတင်ပဲ ရုံတင်ငွေစုစုပေါင်း အိန္ဒိယရူပီး (၁၀၇.၅) ကုဋေ အထိ ရရှိခဲ့တာ ဖြစ်ပါတယ်။

Pathaan ဟာအိန္ဒိယနိုင်ငံရဲ့ရုပ်ရှင်ရုံပေါင်းငါးထောင်ကျော်နဲ့ ပြည်ပရုပ်ရှင်ရုံပေါင်းနှစ်ထောင်ကျော်မှာရုံတင်ပြသနေတာဖြစ်ပြီး ပြည်ပရုံတင်ငွေအားဖြင့် ကန်ဒေါ်လာသန်းနှစ်ဆယ်အထိရရှိနိုင်တယ်လို့လည်း  သုံးသပ်မှုတွေရှိနေကြတာ ဖြစ်ပါတယ်။

Pathaan ဟာ ( ၂၀၂၃) အတွက် အကောင်းဆုံး Bollywood ရုပ်ရှင်အဖြစ်ရပ်တည်နေပြီး War နဲ့ KGF Chapter (2) တိုရဲ့စံချိန်ကိုပါရိုက်ချိုးခဲ့တာ ဖြစ်ပါတယ်။ဒါ့ကြောင့်ရှာရွတ်ခမ်းဟာ ဘောလိဝုဒ်ရုပ်ရှင်လောကကို အကောင်းဆုံး ပြန်လည်ကယ်တင်ခဲ့ပြီး သူဟာ အခုအချိန်အထိ ဘုရင်တစ်ပါးဖြစ်နေဆဲ ဖြစ်ကြောင်း အကောင်းဆုံးသက်သေပြခဲ့ပါတယ်။

Photos: Credit