မင်းသား Jung II Woo ဆိုတာက High Kick 1 ဇာတ်လမ်းကနေ ပေါ်ထွက်လာသူဖြစ်ပြီး ချောမောတဲ့ အပြင် သရုပ်ဆောင် ထူးချွန်တဲ့သူ တစ်ဦးပဲဖြစ်ပါတယ်။  High Kick ရဲ့ ပထမဆုံးဇာတ်လမ်းတွဲကို ၂၀၀၆  ခုနှစ်မှာ ထုတ်လွှင့်ခဲ့ပြီးတော့ လူကြိုက်အများဆုံး ဇာတ်လမ်းတွဲဖြစ်ခဲ့ကာ နောက်ထပ် ဇာတ်လမ်းတွဲတစ်ခုကို ထပ်မံရိုက်ကူးခဲ့ရတဲ့ အထိ အောင်မြင်ခဲ့ပါတယ်။

Jung II Woo က High Kick ရဲ့ ပထမဆုံးဇာတ်လမ်းတွဲမှာ အမျိုးသားဇာတ်ဆောင်အနေနဲ့ ပါဝင်သရုပ်ဆောင်ခဲ့တာဖြစ်ပြီး Lee မိသားစုရဲ့ ပုန်ကန်တတ်တဲ့ အငယ်ဆုံးမြေးဖြစ်တဲ့ Lee Yoon Ho အဖြစ် သရုပ်ဆောင်ခဲ့ပါတယ်။ Yoon Ho က ချောမောတဲ့အသွင်အပြင်၊ ကလေးမျက်နှာ၊ မော်တော်ဆိုင်ကယ်မောင်း ကျွမ်းကျင်မှု နဲ့ လူတွေရဲ့ ချစ်ခြင်းမေတ္တာကို ရရှိထားပေမယ့် ပညာမတတ်ဘဲ တိုက်ပွဲကို နှစ်သက်ကာ မိသားစုကို ဒုက္ခများစွာပေးတဲ့ ဇာတ်ကောင်ပဲဖြစ်ပါတယ်။ ဒီဇာတ်ကောင်ဟာ အမျိုးသမီး ပရိသတ်တွေရဲ့ အသည်းကျော်လည်း ဖြစ်ခဲ့ပါတယ်။

Jung Il Woo ကို ၁၉၈၇ ခုနှစ်မှာ မွေးဖွားခဲ့တာဖြစ်ပြီး High Kick 1 မှာ သရုပ်ဆောင်ချိန်တုန်းက အသက် ၁၉ နှစ်သာရှိပါသေးတယ်။ နောက်ပြီး ဒီဇာတ်ကားဟာ Jung Il Woo ရဲ့ အနုပညာ အသက်မွေးဝမ်းကြောင်း အတွက် ပထမဆုံးသော ဒရာမာဖြစ်သလို ပထမဆုံး အမျိုးသားဇာတ်ဆောင် အဖြစ် သရုပ်ဆောင်ရတာလည်း ဖြစ်ပါတယ်။

၂၀၀၆ ခုနှစ်မှာတည်းက “The World of Silence” ဇာတ်ကားနဲ့ Jung Il Woo က  ပွဲဦးထွက်ခဲ့တာ ဖြစ်ပါတယ်။ High Kick 1 ပြီးနောက် Jung Il Woo က “My Love” ဇာတ်ကားမှာ ဇာတ်ဆောင်နေရာကနေ ပါဝင်သရုပ်ဆောင်ခဲ့ပြီး တီဗီစီးရီးဖြစ်တဲ့ “The Return of Iljimae” မှာလည်း သရုပ်ဆောင်ခဲ့ပါတယ်။ Jung Il Woo ပါဝင်သရုပ်ဆောင်ထားတဲ့ နာမည်ကြီး ဇာတ်ကားတွေကတော့ "The Moon Embracing the Sun"၊ "High-end Crush"၊ "Love and Lies" "Bossam: Steal the Fate" တို့ပဲဖြစ်ပါတယ်။

Jung Il Woo က အရည်အချင်းရှိသူတစ်ယောက်ဖြစ်ပေမယ့် အနုပညာနယ်ပယ်မှာတော့ တော်တော်လေးကို ရုန်းကန်နေဆဲပါ။ အသက် ၃၄ နှစ်အရွယ်ရှိပြီဖြစ်တဲ့ Jung Il Woo အတွက် လိုအပ်နေတဲ့အရာကတော့ သူနဲ့ ထိုက်တန်တဲ့အောင်မြင်မှုကို ဆွတ်ခူးပေးနိုင်တဲ့ ဇာတ်ညွှန်းနဲ့ ဇာတ်ကောင်ပဲ ဖြစ်ပါတယ်။

source - kbizoom