ပြီးခဲ့တဲ့အပတ်က မားစ်ဂြိုလ်ပေါ်က စူးစမ်းလေ့လာရေးယာဥ်ပေါ်ကနေ ပေးပို့လိုက်တဲ့ခပ်မှုန်မှုန်ပုံလေးတစ်ပုံကို နာဆာကချပြခဲ့ပြီးတော့ လူတွေအားလုံးကြားထဲမှာ အငြင်းပွားစရာဖြစ်လာခဲ့ပါတယ်။ဘာကြောင့်ဆိုအဲ့ဒီပုံထဲမှာ ကျောက်တုံးနှစ်ခုကြားက တံခါးပေါက်ပုံစံပုံရိပ်လေးကို ပြတ်ပြတ်သားသားမြင်ရတာကြောင့်ပါ။အဲ့ဒီတံခါးပေါက်လေးဟာ ဂြိုလ်သားတွေရဲ့တံခါးပေါက်ဖြစ်မလား၊မားစ်ပေါ်ကသက်ရှိတွေရဲ့အထောက်အထားတွေဖြစ်မလားဆိုပြီး ငြင်းခုန်လာကြတာဖြစ်ပါတယ်။

ကမ္ဘာ့အပြင်ကိုထွက်ပြီး ကောင်းကင်ကြီးပေါ်က ဂြိုလ်ကြီးတွေပေါ်ကို လိုက်လေ့လာတိုင်းမှာ တကယ်မရှိတဲ့အရာတွေကိုပဲ အမြဲမြင်ရတတ်လို့ အဲ့ပုံတွေပြန်ပျံ့လာရင် လူတွေကငြင်းခုန်ကြရစမြဲပါ။မကြာသေးမှီကလည်း တရုတ်စူးစမ်းလေ့လာရေးယာဥ်တစ်စီးဟာဟာ လပေါ်မှာ ထူးဆန်းတဲ့တဲအိမ်လေးတစ်ခုကိုတွေ့ခဲ့လို့ ငြင်းကြခုန်ကြပြီး သီအိုရီတွေထုတ်ကြပေမဲ့ နောက်ဆုံးတော့လည်း အရိပ်ကျနေတဲ့ ကျောက်တုံးလေးတစ်တုံးပါပဲ။

အခုမားစ်ဂြိုလ်ပေါ်မှာတွေ့ရတဲ့ တံခါးပေါက်လိုလို အရာဟာလည်း ပုံမှန်ပထဝီဝင်ဖြစ်စဥ်တစ်ခုကြောင့်ဖြစ်ပေါ်လာတာပါလို့ သိပ္ပံပညာရှင်တွေကထုတ်ပြောလာပါပြီ။ပုံကိုသေချာကြည့်ရင် အဲ့ဒီတံခါးပေါက်ရဲ့အလယ်တည့်တည့်မှာ အက်ကွဲကြောင်းကြီးတစ်ခုကိုတွေ့ရမှာပါ။

အဲ့လိုမျိုးတွေဟာ ကမ္ဘာပေါ်မှာလည်း ခဏခဏတွေ့နေရပြီး ဘာမှထွေထွေထူးထူးဖြစ်စဥ်မဟုတ်ပါဘူး။ပြီးတော့ကပ်ရိုက်ထားတာကြောင့်သာ အကြီးကြီးလို့ထင်နေရပေမဲ့ တကယ်တမ်းတော့ ၃၀ စင်တီမီတာကနေ ၄၀ စင်တီမီတာလောက်ထိသာရှိတဲ့ အက်ကွဲကြောင်းလေးပါ။

အဲ့ဒီကျောက်တုံးကို ဂြိုလ်သားတွေရဲ့တ့ခါးပေါက်လို့ထင်နေကြသူတွေအတွက်တော့ သတင်းဆိုးပေါ့။သတင်းကောင်းကတော့ မားစ်ပေါ်က စူးစမ်းလေ့လာရေးယာဥ်ဟာ ဂြိုလ်ပေါ်မှာသက်ရှိတွေရှိနေသေးလား၊ရှိရောရှိခဲ့လားဆိုတာကို ဆက်လက်ရှာဖွေနေဦးမှာဖြစ်ပါတယ်။