ကိုယ်က တစ်စုံတစ်ယောက်ကို စိတ်ဝင်စားနေတာလား ၊ ချစ်နေတာလားဆိုတာ ခွဲခြားသိမြင်စေဖို့လိုအပ်ပါတယ်။ ဒီအချက်လေးတွေနဲ့ ကိုက်ညီရင်တော့ တကယ်ချစ်တာ သေချာပါပြီ။

၁။ ပြောင်းလဲလာတယ်

သူနဲ့ မတွေ့ခင်တုန်းက ကိုယ့်ရဲ့အနေအထိုင်က တစ်မျိုး ၊ သူနဲ့တွေ့ပြီးမှ အနေအထိုင်တွေ ပြောင်းလဲလာတတ်ပါတယ်။ ခပ်ဆိုးဆိုးကောင်မလေးတစ်ယောက်ဟာ အချစ်စစ်နဲ့တွေ့ရင် နူးညံ့သိမ်မွေ့သွားနိုင်သလို ရိုးသားအေးဆေးတဲ့ လူငယ်တစ်ယောက်ဖြစ်စေကာမူ အချစ်စစ်နဲ့တွေ့လိုက်ရင် ခပ်ဆိုးဆိုးစရိုက်အဖြစ် ပြောင်းလဲနိုင်စွမ်းရှိပါတယ်။ အချစ်နဲ့တွေ့ရင် ဖယောင်းဟာ သံမဏိဖြစ်နိုင်သလို သံမဏိဟာလည်း ဖယောင်းဖြစ်သွားစေပါတယ်။

၂။ မတွေ့ရ မနေနိုင်ဖြစ်လာတယ်

ကိုယ်တစ်ကယ်ချစ်ရတဲ့ ကောင်မလေးကို အမြဲတမ်း မြင်ချင်တွေ့ချင်နေမိတယ်။ သူ့ကို မတွေ့ရရင်တောင် သူ့ဓာတ်ပုံလေးကို ခိုးနမ်းမိနေတာမျိုး ၊ ရှိန်းတိန်းဖိန်းတိန်းခံစားမှုတွေကို ခံစားဖူးကြမှာပါ။ နေ့သစ်မှာ သူ့မျက်နှာလေးကို မော်ဖူးချင်လွန်းလို့ သူသွားရာလမ်းမှာ မယောင်မလည် ချောင်းကြည့်မိတာနေတာမျိုး ၊ သူ့အသံလေး ကြားချင်လွန်းလို့ ဖုန်းမှားခေါ်မိသလို သူ့ဖုန်းနံပါတ်ကို တမင်ခေါ်မိတာမျိုး လုပ်တတ်ကြပါတယ်။

၃။ မနာလိုဖြစ်တတ်လာတယ်

ပုံမှန်အားဖြင့် သဘောထားကြီးလွန်းတဲ့ ပုဂ္ဂိုလ်တွေတောင် အချစ်စစ်နဲ့တွေ့ရင် မနာလိုစိတ်ဖြစ်လာကြပါတယ်။ ကိုယ့်ချစ်ရတဲ့ကောင်မလေးနားကို တခြားကောင်လေးတစ်ယောက်နဲ့တွဲမြင်မိပြီဆို ငယ်ထိပ်မြွေပေါက်ခံရသလိုမျိုး ခြေမကိုင်မိ လုပ်မကိုင်မိ ခံစားလာတတ်ကြပါတယ်။ ကိုယ့်ချစ်သူနားမှာ အဖိုသတ္တဝါကိုမြင်မိရင် အလိုလိုဒေါသဖြစ်လာပြီး အူနုကျွဲခတ်သလို ခံစားတတ်ကြပါတယ်။

၄။ နားလည်ပေးတတ်လာတယ်

ကိုယ်တိတ်တခိုးချစ်ရတဲ့ ကောင်မလေးရုံးနောက်ကျနေပြီဆိုရင်တောင် ရထားဘီးများ ပေါက်လို့လားဆိုပြီး ကြံဖန်နားလည်ပေးတတ်ကြပါတယ်။ ကိုယ့်ကောင်မလေး ဖြစ်စေချင်တဲ့ကိစ္စ ၊ လုပ်ချင်တဲ့အလုပ်မှန်သမျှ မဖြစ်ဖြစ်အောင် ချွေးကိုရင်း ခန္ဓာကိုယ်ကို စတေးပြီး စေတနာဝန်ထမ်းကြီးဖြစ်မှန်းမသိ ဖြစ်လာကြပါတယ်။ သူမအမှားမှန်သမျှကိုလည်း သင်ပုန်းချေပေးပြီး ရှေ့ဆက်ဘယ်လိုဖြစ်သန်းသွားကြမလဲဆိုတဲ့ အတွေးမျိုးနဲ့ ပြုံးပျော်နေကြသူများဖြစ်ပါတယ်။

၅။ အချိန်ပေးလာတယ်

ကိုယ်တကယ် ချစ်မိပြီဆိုရင် သူမနဲ့ကုန်ဆုံးရမယ့် အချိန်တွေကိုတန်ဖိုးထားလွန်းလို့ စက္ကန့်တွေတောင် စိန်စီထားချင်လာပါတယ်။ ကိုယ့်တစ်နေ့တာ ၂၄နာရီလုံးလုံး သူမနဲ့ပဲ ကုန်ဆုံးချင်လာပါတယ်။ သူမနဲ့တွေ့ဆုံပြီးရင်တောင် အတွေးထဲမှာ စိုးမိုးလွန်းတဲ့အတွက် အိပ်မက်ထဲထိတောင် အလည်ခေါ်ကြသူများဖြစ်ပါတယ်။

ဒီအချက်လေးတွေနဲ့ ကိုက်ညီနေရင်တော့ ကိုယ်ဟာ တစ်ယောက်ယောက်ကို အချစ်စစ်နဲ့ချစ်မိနေတာ သေချာနေပါပြီ။ ကိုယ့်မှာတကယ်စွဲစွဲလမ်းလမ်းချစ်ရတဲ့ ကောင်မလေးရှိလာရင်တော့ တွေဝေမနေပါနဲ့ ။ ချက်ချင်းပဲ ရင်ဖွင့်လိုက်ပါတော့။