ကိုဗစ်အလွန် စီးပွားရေး ပြန်ဆွဲတင်ဖို့ ဆေးခြောက်ကို အသုံးချမဲ့ ထိုင်းနိုင်ငံ

၂၀၁၉ နှစ်ကုန်ကစလို့ ၂၀၂၀ နဲ့ ၂၀၂၁ နှစ်နှစ်ဟာ ခရီးသွားလုပ်ငန်းတွေ အထိနာခဲ့ရတဲ့ နှစ်တွေ ဖြစ်ပါတယ်။ အထူးသဖြင့် ခရီးသွားလုပ်ငန်းနဲ့ ရပ်တည်နေတဲ့ နိုင်ငံတွေဆို ပိုနစ်နာခဲ့ရပါတယ်။ အဲဒီထဲမှာ မြန်မာ့အိမ်နီးချင်း ထိုင်းနိုင်ငံလည်း ပါပါတယ်။

ကိုဗစ်အလွန်မှာ ခရီးသွားလုပ်ငန်း ပြန်လည်ပတ်နိုင်ဖို့ ထိုင်းနိုင်ငံက ဖြေလျော့မှုတွေ အများကြီး လုပ်ပေးခဲ့၊ လုပ်ပေးလျက် ရှိပါတယ်။

ထူးခြားချက်တစ်ခုက နောက်ပိုင်း ခရီးသွားလုပ်ငန်းမှာ ကမ္ဘာလှည့်ခရီးသည်တွေကို ဆွဲဆောင်ဖို့ ဆေးခြောက်ကို အသုံးချမဲ့ အလားအလာတွေ တွေ့လာရတာပဲ ဖြစ်ပါတယ်။

၂၀၂၂ ဇန်နဝါရီလမှာ ထိုင်းနိုင်ငံ မူးယစ်ဆေးဝါးတိုက်ဖျက်ရေး ကော်မတီက ဆေးခြောက်ကို မူးယစ်ဆေးဝါး စာရင်းထဲက ပယ်ဖျက်ပေးခဲ့ပါတယ်။ ဒီလိုပယ်ဖျက်ပေးမှုဟာ အရှေ့တောင်အာရှမှာ ပထမဆုံးပါပဲ။ ဒါကြောင့်လည်း ဒီသတင်းဟာ တစ်ကမ္ဘာလုံး ဟိုးလေးတကြော် ဖြစ်ခဲ့ပါတယ်။

မူးယစ်ဆေးဝါးစာရင်းက ပယ်ဖျက်ပေးပြီးတာနဲ့ လွှတ်တော်မှာ ဆေးခြောက်သုံးစွဲခွင့်နဲ့ စိုက်ပျိုးထုတ်လုပ်ရောင်းချခွင့် ဥပဒေမူကြမ်းကို တင်သွင်းထားပြီး ဖြစ်ပါတယ်။ ဒီဥပဒေ အတည်ပြုပြီးရင်တော့ အစိုးရဆီမှာ လိုင်စင်လျှောက်ပြီးတာနဲ့ လူတိုင်း ဆေးခြောက်စိုက်ခွင့် ရရှိသွားပါပြီ။  

တကယ်တော့ ဒီလို တရားဝင် ခွင့်ပြုချက် မရခင်ကတည်းက ချင်းမိုင်၊ ဖူးခက်နဲ့ ပတ္တယား စတဲ့ မြို့တွေ ကမ်းခြေတွေမှာ ဆေးခြောက်စျေးကွက် ရှိနေခဲ့ပါတယ်။ ထိုင်းနိုင်ငံ အစိုးရကတော့ ဆေးခြောက်ကို အပျော်သုံးစွဲဖို့ထက် ဆေးကုသတဲ့နေရာမှာ အများအပြား သုံးသွဲဖို့ ရည်ရွယ်ထားတယ်လို့ သိရပါတယ်။

Ref : https://www.theguardian.com/world/2022/apr/05/thailand-dreams-of-high-end-cannabis-tourism-after-marijuana-is-legalised