ဥတ္တရအလင်းတန်းလို့ခေါ်တဲ့ Northern Light ကိုကမ္ဘာတစ်လွှားကလူတွေက သူပေါ်လာတတ်တဲ့နေရာတွေမှာစောင့်ကြည့်ကြတတ်ပါတယ်။ လွန်ခဲ့တဲ့ စနေနေ့ကအမေရိကန် အလက်စကာပြည်နယ်က နေရာတစ်ခုမှာတော့ ဒီအစိမ်းရောင် ဥတ္တရအလင်းတန်းတွေကြားထဲမှာ အဖြူရောင်စက်ဝိုင်းပုံတစ်ခုပေါ်လာခဲ့ပါတယ်။ 

အလင်းတန်းကိုစောင့်ကြည့်နေသူတွေဟာ ဒီအမည်မသိစက်ဝိုင်းကို ဂြိုလ်သားတွေကမ္ဘာမြေပေါ်ကိုဝင်ရောက်လာမဲ့တံခါးပေါက်ဖြစ်နိုင်တယ်လို့ ထင်ကြေးပေးပြီးထိတ်လန့်ခဲ့ကြပါတယ်။ ဂြိုလ်သားတွေဆိုတာ လူတွေအတွက်ထိတ်လန့်ကြောက်မက်ဖွယ်ရာသတ္တဝါတွေဖြစ်တာကြောင့် ဒီသတင်းဟာလူတော်တော်များများကို ထိတ်လန့်စေခဲ့ပါတယ်။ 

ဒါပေမဲ့ ဒီအလင်းဝန်းဟာလူတွေထင်ထားသလို ဂြိုလ်သားတွေရဲ့ဝင်ပေါက်မဟုတ်ဘဲ သောကြာနေ့ကပစ်လွှတ်ခဲ့တဲ့ Space X ဒုံးကျည်ကြောင့်ဖြစ်ရတာလို့သက်ဆိုင်ရာတွေကနေပြီးသတင်းထုတ်ပြန်လာခဲ့ပါတယ်။ ဒုံးကျည်ထဲကမလိုအပ်တဲ့လောင်စာတွေကို အာကာသထဲပစ်လိုက်တဲ့အခါ ရေခဲဖြစ်သွားပြီး ကမ္ဘာပေါ်ကနေဒီလိုပုံစံမြင်နေရတာဖြစ်ပါတယ်။

အာကာသရူပဗေဒတွဲဖက်ပါမောက္ခဖြစ်သူ Tom Hampton က ဒုံးကျည်တွေရဲ့စွန့်ပစ်မှုကြောင့် ဒီလိုအဝိုင်းပုံတွေဖြစ်ပေါ်လာခြင်းက အခုမှမဟုတ်ဘဲ အရင်တုန်းကလည်းဖြစ်ဖူးပြီး သူ့အနေနှင့် သုံးကြိမ်လောက်မျက်မြင်တွေ့ဖူးကြောင်း ပြောကြားခဲ့ပါတယ်။

သတင်း အရင်းအမြစ်៖ www.cbc.ca