မွန်ပြည်နယ်၊ ကျိုက်ထိုမြို့နယ်ရှိ ပေါင်းလောင်းတောင်ပေါ်မှာ တည်ရှိတဲ့ သမိုင်းဝင် ဆံတော်ရှင် ကျိုက်ထီးရိုး စေတီတော်ဟာ မြန်မာနိုင်ငံရဲ့ အလွန်တန်ဖိုးထားရာ တန်ခိုးကြီး စေတီတော် တစ်ဆူပဲ ဖြစ်ပါတယ်။

အလွန် ကြည်ညိုဖွယ်စရာကောင်းပြီး ထူးထူးခြားခြား အံ့ဖွယ် တည်ထားကိုးကွယ်ထားတာကြောင့် မြန်မာနိုင်ငံအရပ်ရပ်က ဘုရားဖူးများ လာရောက်ဖူးမြော်ကြတဲ့အပြင် အခုနောက်ပိုင်းမှာ နိုင်ငံတကာက ကမ္ဘာလှည့်ခရီးသွားတွေပါ လာရောက်ကြတာ ဖြစ်ပါတယ်။

ကျိုက်ထီးရိုး စေတီတော်ရဲ့ ဘုရားပွဲတော်ဟာ နှစ်စဉ် သီတင်းကျွတ်လပြည့်နေ့မှ ကဆုန်လပြည့်နေ့အထိ ၇ လတာ ပုံမှန်ကျင်းပပြီး ဘုရားဖူးသူများနဲ့ ကြက်ပျံမကျ စည်ကားလျက်ရှိတာ ဖြစ်ပါတယ်။ ဒါပေမယ့် ကိုဗစ်ကပ်ရောဂါ ကူးစက်မှုမြင့်တက်ခဲ့တဲ့ ကာလတစ်လျှောက်မှာတော့ ဘုရားပွဲတော်ကို ကျင်းနိုင်ခဲ့ခြင်း မရှိခဲ့ပါဘူး။

ယခုမှာတော့ ဘုရားဖူးသူ တော်တော်များများ မြင်တွေ့ရခဲတဲ့ ဆံတော်ရှင်ကျိုက်ထီးရိုး စေတီတော်ရဲ့ ပုံရိပ်တချို့ပြန်လည်ဖော်ပြပေးချင်ပါတယ်။ ဒါကတော့ တကယ့်ကို ရှားရှားပါးပါး ဖူးမြော်ထိုက်မှ ဖူးခွင့်ရတဲ့ ကျိုက်ထီးရိုးစေတီတော် ထီးတော် အနီးကပ် မြင်ကွင်းပဲ ဖြစ်ပါတယ်။

ဒီပုံလေးတွေကို ဒေသခံတစ်ဦးမှ ရိုက်ကူးဖော်ပြထားတာ ဖြစ်ပါတယ်။ ထီးတော်ဟာ အလွန် ကျက်သရေ အဖြာဖြာတို့ဖြင့် ပြည့်စုံပြီး တကယ့်ကို ဖူးမြော်မြင်တွေ့ရခဲတာကြောင့် ဗုဒ္ဓဘာသာဝင်များအတွက် ပြန်လည်ဖူးမြော်နိုင်အောင် ဖော်ပြပေးလိုက်ပါတယ်