ခုခေတ်မှာ အလှအပကို နည်းလမ်းပေါင်းစုံနဲ့ လှပဖို့ကြိုးစားလို့ရနေကြတဲ့အချိန်ဖြစ်တဲ့အတွက် ခေတ်မှီနည်းပညာများစွာလည်း တိုးတက်လာကြပြီဖြစ်ပါတယ်။ အဲ့ထဲမှာမှ Filler ထိုးနေကြတဲ့ အကြောင်းတွေဟာ မိန်းကလေးတွေအကြား Hit ဖြစ်နေတဲ့အကြောင်းအရာတစ်ရပ်ဖြစ်နေပါတယ်။

Filler ထိုးခြင်းဟာ ပိုပြီးလှပသွားနိုင်တယ်ဆိုပေမယ့် တကယ့်တကယ် Filler ထိုးတော့မယ်ဆိုရင်တော့ သူ့ရဲ့ ​ဘေးထွက်ဆိုးကျိုး​တွေကို​တော့ သိထားဖို့ လိုအပ်ပါတယ်။ Filler ထိုးခြင်းဟာ ရာခိုင်နှုန်းအပြည့် အန္တရာယ် ကင်းတဲ့ ကုသမှုမျိုးမဟုတ်တာကိုတော့ သတိ​ထားရပါမယ်။ အထူးသဖြင့် ဆရာဝန် မဟုတ်​တဲ့သူ​တွေ နဲ့ Fillerထိုး​တော့မယ်ဆိုရင် ပိုလို့​ သတိထားရပါမယ်။ Filler ထိုးမယ်ဆိုရင်တော့ဖြစ်နိုင်ရင် တတ်သိနားလည်တဲ့ ကျွမ်းကျင် အလှအပဆရာဝန်တွေနဲ့သာထိုးသင့်ပါတယ်။

Filler ထိုးသူ အများစုဟာ မျက်နှာ ၊ ရင်သားနဲ့ တင်ပါး​အစရှိတဲ့နေရာမှာအထိုးများကြတာဖြစ်တဲ့အတွက် အထူးသတိထားသင့်ပါတယ်။ Filler ထိုးရင်းနဲ့ အခန့်မသင့်ဖြစ်လာနိုင်တဲ့ ဘေးထွက်ဆိုးကျိုးတွေအနေနဲ့ကတော့ ​ဆေးခဲပြီး အဖု​အထစ်များဖြစ်လာခြင်း ၊ ပိုးဝင်နာ ဖြစ်ခြင်း တို့ပဲဖြစ်ပါတယ်။ ဒါ့အပြင် Filler ဆေးဟာ ပျစ်တဲ့အတွက် အ​ရေပြား​အောက်ထိုးသွင်းတဲ့အခါ ​သွေး​ကြောထဲ မ​တော်တဆ ဝင်သွားခဲ့ပြီး ပိတ်သွားတတ်ပါတယ်။ ၎င်း ​သွေး​ကြောကနေ ​ထောက်ပံ့အာဟာရ​ပေးတဲ့ ​အရာ​တွေက ပိတ်ပြီး ပုပ်သွားတာမျိုးတွေလည်း ဖြစ်တတ်ပါတယ်။

အ​ရေပြား ပုပ်သွားခဲ့ ရင် ထိုအနာကို ဘယ်လိုပင်ပြန်ကုစေကာမူ နဂိုမူရင်းအနေအထားသို့ပြန်ရောက်ဖို့ဆိုတာမဖြစ်နိုင်တော့ပါဘူး။ ဒီ့ထက်ဆိုးရွားတဲ့ အဆိုးဆုံး ​ဘေးထွက်ဆိုးကျိုးက​တော့ မျက်လုံးကန်းခြင်းဖြစ်ပါတယ်။ မျက်လုံးကို ​ထောက်ပံ့​ပေးတဲ့ ​သွေး​ကြောထဲ ဝင်​ရောက်ခဲ့တဲ့အခါမျိုးမှာ အချိန်မှီ အ​ရေး​ပေါ်မကုသနိုင်ရင် တစ်သက်တာ ပြန်လည်ကုသလို့ မရနိုင်​​တောဘအောင် မျက်စိကန်းမှာဖြစ်ပါတယ်။ ဒီလိုမျက်စိကို ထိသွားတဲ့ ဖြစ်ရပ်တွေက ဘယ်လိုအချိန်တွေမှာ အဖြစ်များတတ်လဲဆို​ရင်တော့ nose filler, smile line Filler, မျက်ကွင်း Filler ,နားထင် နဖူး Filler ​​နေရာ ​သွေး​ကြော​တွေဟာ မျက်လုံးကို ​ထောက်ပံ့​ပေးတဲ့ ​သွေး​​ကြော​တွေနဲ့ အနီးစပ်ဆုံး ဆက်နွယ်​နေခြင်း​ကြောင့်ပါ။

ဒီလိုဆိုးရွားတဲ့ ဘေးထွက်ဆိုးကျိုးတွေဖြစ်တတ်တဲ့အတွက်ကြောင့်မို့ တကယ်လို့ သင်ဟာ Filler ထိုးဖို့စဥ်းစားထားတယ်ဆိုရင်တော့ ​သေချာစဥ်းစား​ပြီး ​ဆေးခန်း​တွေ မှာဆရာဝန် ​တွေနဲ့ ​သေချာ စနစ်တကျ ​ဆွေး​နွေးပြီး ကုသမှု ခံယူဖို့အကြံပေးပါရစေ။