Blood Fall လို့ခေါ်တဲ့ အနီရောင်ရေတံခွန်ဟာ ဖြူဖွေးတဲ့နှင်းထုတွေအပြည့်ဖြစ်နေတဲ့ အန္တာတိကတိုက်တစ်နေရာမှာတည်ရှိနေပါတယ်။ ဒီသွေးရေတံခွန်ကို လွန်ခဲ့တဲ့နှစ်ပေါင်းတစ်ရာကျော်လောက်က ဘူမိဗေဒပညာရှင် တေလာဆိုတဲ့သူကစတင်တွေ့ခဲ့တာဖြစ်ပါတယ်။ ဒီရေတံခွန်ဟာ ကမ်းပါးအသေးလေးတစ်ခုကနေစီးကျနေတာဖြစ်ပြီးတော့ နေရာတစ်နေရာမှာပဲကွက်ပြီးအနီရောင်ဖြစ်နေတာဖြစ်ပါတယ်။
၂၀၁၇ မှာ လေ့လာရေးလုပ်တဲ့လူတစ်စုက ရေတံခွန်ဘေးကကျောက်ဆောင်တွေမှာ ဆားဓာတ်တွေပါဝင်တာကိုသိခဲ့ရပါတယ်။ ဒါပေမဲ့ ဒီဆားဓာတ်တွေဟာ ရေကိုအနီရောင်ပြောင်းစေရလောက်တဲ့အထိတော့ မများပါဘူး။ ဒါ့အပြင် ရေညှိတွေကြောင့် ပြောင်းသွားတာဖြစ်နိုင်တယ်လို့ယူဆကြပေမဲ့ ဒီသွေးရေတံခွန်အနီးတဝိုက်မှာ အနီရောင်ရေညှိတွေကိုမတွေ့ရပါဘူး။
နှစ်အတော်ကြာ ပညာရှင်တွေကို ခေါင်းခဲစေခဲ့တဲ့ ဒီသွေးရေတံခွန်ဟာ နောက်ဆုံးမှာတော့ အနီရောင်ဖြစ်ရတဲ့အကြောင်းရင်းကိုသိလာခဲ့ရပါတယ်။ သွေးရေတံခွန်အနီးမှာ နာနိုစဖီးယားလို့ခေါ်တဲ့ သတ္တုအနည်းငယ်ကိုတွေ့ခဲ့ရတာပါ။ ဒီနာနိုစဖီးယားဟာ အောက်ဆီဂျင်နှင့်ဓာတ်ပြုလိုက်ချိန်မှာရေအဖြူရောင်ကိုအနီရောင်အဖြစ်လုံးဝပြောင်းလဲသွားစေခဲ့တာဖြစ်ပါတယ်။ နာနိုစဖီးယားပါဝင်မှုအပေါ်ကိုလိုက်ပြီးတော့ သွေးရေတံခွန်ရဲ့အရောင်ဟာ အနုအရင့်ကွဲပြားနိုင်ပါတယ်။