တောင်ပြုန်းပွဲတော်လို့လူသိများတဲ့ ဒီဘုရားပွဲဟာဆိုရင် မြန်မာနိုင်ငံမှာနာမည်အကြီးဆုံးနှင့်အစည်ကားဆုံးလို့ဆိုနိုင်တဲ့ နတ်ပွဲကြီးဖြစ်ပါတယ်။ ဘုရားပွဲတော်အဖြစ်စတင်ကျင်းပခဲ့ပေမဲ့ တောင်ပြုန်းမင်းနှစ်ပါးကိုပူဇော်ပသတဲ့ပွဲအနေနှင့်နာမည်ကြီးလာတဲ့ ဒီပွဲတော်ကြီးဟာ နှစ်ရက်ကြာကျင်းပတဲ့ပွဲကြီးဖြစ်ပါတယ်။
ပွဲတော်အတွင်းမှာ တောင်ပြုန်းနတ်ညီနောင်နှစ်ပါးကိုယုံကြည်ကိုးကွယ်ပြီး လာပူဇော်ပသတဲ့သူတွေရှိသလို အပျော်အပါးအတွက်သီးသန့်လာတဲ့သူတွေလည်းရှိပါတယ်။ ပွဲရဲ့အဓိကဖြစ်တဲ့နတ်နန်းမှာဆိုရင် ခြေချလို့မရအောင်စည်းကားလေ့ရှိပြီးတော့ အလှူငွေတွေလည်းမြောက်များစွာရလေ့ရှိပါတယ်။ ဒီတောင်ပြုန်းပွဲဟာ မြန်မာလူမျိုးတွေအတွက် ရိုးရာပွဲတော်တစ်ခုလိုမျိုးဖြစ်နေတဲ့အပြင် တစ်ချို့ဒေသတွေမှာဆိုရင် မဖြစ်မနေသွားရမယ့်ပွဲတော်လိုမျိုးယုံကြည်မှုပါရှိနေတာဖြစ်ပါတယ်။
တောင်ပြုန်းညီနောင်နှစ်ပါးကိုပူဇော်ပသတဲ့အပြင် ပွဲကျင်းပရာနေရာမှာ အနော်ရထာမင်းတည်ထားခဲ့တဲ့ ဆုတောင်းပြည့်ဘုရားနှင့် နောက်ပိုင်းထပ်တည်ထားတဲ့ ဆုတောင်းရဘုရားလည်းရှိတာကြောင့် ဘုရားပွဲတော်လို့လည်းဆိုနိုင်ပါတယ်။ တစ်ခြားနတ်ပွဲတွေနှင့်မတူတာကတော့ တောင်ပြုန်းပွဲတော်ဟာ အလွန်စည်ကားပြီးတော့ ပွဲတော်ရက်နှစ်ရက်မတိုင်ခင် တစ်ပတ်အလိုကတည်းကအတော်လေးစည်ကားနေတတ်တဲ့ပွဲတော်ပဲဖြစ်ပါတယ်။
Bong I.T