အရှေ့တောင်အာရှမျိုးရင်းဖြစ်တဲ့ ပလက်တီနမ်အာရိုဝါနာ Platinum Arowana ငါးဟာ ရေချိုငါးဖြစ်ပြီးတော့ ကမ္ဘာပေါ်က အလှမွေးငါးမျိုးစိတ်တွေထဲမှာ ဈေးအကြီးဆုံးငါးဖြစ်ပါတယ်။ ပြောင်လက်နေတဲ့ငွေရောင်ကိုယ်ထည်နှင့် ကြီးမားတဲ့အကြေးခွံတွေကြောင့် အာရိုဝါနာငါးဟာလှပကျော့ရှင်းတဲ့ငါးအဖြစ်သတ်မှတ်ခံရပါတယ်။
ပလက်တီနမ်အရောင်ဖြစ်ရခြင်းဟာ မျိုးရိုးဗီဇပြောင်းလဲမှုကြောင့်ဖြစ်ပြီးတော့ တစ်ကိုယ်လုံးငွေရောင်ဖြစ်နေတဲ့အာရိုဝါနာငါးတွေဟာအတော်လေးရှားပါးပါတယ်။ အကောင်သေးပေမဲ့ သားရဲမျိုးစိတ်ဖြစ်တာကြောင့် ငါးအသေးစားလေးတွေကိုခုန်အုပ်ဖမ်းတတ်တဲ့ အာရိုဝါနာဟာ တောရိုင်းထဲမှာဆိုရင် အနှစ်နှစ်ဆယ်ကျော်ထိအသက်ရှင်နိုင်ပါတယ်။ အရှေ့တောင်အာရှမျိုးရင်းဖြစ်ပေမဲ့ အာရိုဝါနာငါးတွေကို ဩစတေးလျ အာဖရိကနှင့်တောင်အမေရိကဒေသတွေမှာလည်းတွေ့ရတတ်ပါတယ်။
ယုံတမ်းနှင့်ပုံပြင်တွေအရ အာရိုဝါနာငါးတွေဟာ စီးပွားရေးနှင့်ကံကောင်းမှုကိုယူဆောင်ပေးတဲ့ငါးတွေဖြစ်ပါတယ်။ သားဖောက်ဖို့ခက်ခဲတဲ့ငါးမျိုးစိတ်ဖြစ်တာကြောင့် ငါးမျိုးစိတ်အရေအတွက်ဟာ အနည်းအကျဥ်းပဲရှိပါတယ်။ ဒီအကြောင်းတွေကြောင့် ပလက်တီနမ်အာရိုဝါနာငါးတွေဟာ ငါးစုဆောင်းသူတွေရဲ့အိမ်မက်တစ်ခုဖြစ်လာပြီးတော့ ငါးအရွယ်အစားနှင့်ပုံစံကိုလိုက်ပြီး ဒေါ်လာ သောင်းဂဏန်းကနေ သိန်းကျော်အထိပေါက်ဈေးရှိနေပါတယ်။
Bong I.T