ကမ္ဘာပေါ်ကတိရိစ္ဆာန်မျိုးစိတ်အများစုမှာ ထူးခြားတဲ့ပင်ကိုစွမ်းရည်နှင့် အသွင်အပြင်တွေပိုင်ဆိုင်ထားကြပါတယ်။ ဒီလိုထူးခြားတဲ့စွမ်းရည်ကိပိုင်ဆိုင်ထားတဲ့ တိရိစ္ဆာန်အချို့မှာ အပင်တွေလို မိတ်မလိုက်ဘဲမျိုးပွားနိုင်တဲ့တိရိစ္ဆာန်တွေရှိပါတယ်။ ဒီထဲကမှ လူသိများတဲ့တိရိစ္ဆာန် (၃) မျိုးကို ဖော်ပြပေးသွားပါမယ်။

(၁) ငါးမန်း

ငါးမန်းတွေဟာ အချိန်ကြာမြင့်စွာမိတ်မလိုက်တဲ့အခါ Parthenogenesis နည်းလမ်းနဲ့ မျိုးပွားကြပါတယ်။ Parthenogenesis ဆိုတာ မျိုးမအောင်တဲ့ဥတွေကတစ်ဆင့် သန္ဓေသားပေါက်ဖွားလာတဲ့ လိင်မျိုးပွားမှုပုံစံတစ်မျိုးဖြစ်ပြီး အချိန်ကြာမြင့်စွာ အထီးနဲ့ကင်းကွာတဲ့ တိရိစ္ဆာန်အမတွေမှာ အဖြစ်များပါတယ်။ မွေးဖွားလာတဲ့ သားပေါက်လေးတွေမှာ ဖခင်ရဲ့ DNA ကို မတွေ့ရဘဲ မိခင်ရဲ့ DNA တစ်မျိုးတည်းသာ တွေ့ရမှာဖြစ်ပါတယ်။ 

(၂) ကိုမိုဒိုနဂါး

ကိုမိုဒိုနဂါးလို့ခေါ်တဲ့ ဖွတ်အထီးတွေဟာ မိတ်လိုက်ရာသီအတွင်းမှာ အချင်းချင်းတိုက်ခိုက်တတ်ကြပါတယ်။ အချို့ဖွတ်အထီးတွေဟာ ဖွတ်အမတွေနဲ့ မိတ်လိုက်အပြီးမှာ အဆိုပါဖွတ်အမကို အခြားဖွတ်ထီးတွေမိတ်မလိုက်နိုင်အောင် ရက်ပေါင်းအတော်ကြာစောင့်နေတတ်ကြပါတယ်။ ကိုမိုဒိုဖွတ်မတွေဟာလည်း ငါးမန်းတွေလို ဖွတ်အထီးနဲ့ဝေးကွာတဲ့အခါ မိတ်လိုက်ခြင်းမရှိဘဲ ဥဥတတ်ကြပါတယ်။ 

(၃) ကြယ်ငါး

ကြယ်ငါးလေးတွေဟာလည်း မိတ်မလိုက်ဘဲ မျိုးပွားနိုင်တဲ့ တိရိစ္ဆာန်တွေဖြစ်ပါတယ်။ သူတို့ရဲ့မျိုးပွားပုံက အခြားတိရိစ္ဆာန်တွေနဲ့မတူဘဲ ထူးခြားပါတယ်။ သူတို့ရဲ့အစိတ်အပိုင်းကို ခွဲထုတ်ပြီး (သို့) နှစ်ခြမ်းခွဲပြီး ကြယ်ငါးနှစ်ကောင်အဖြစ် မျိုးပွားနိုင်ပါတယ်။ ဆိုလိုတာက သူတို့ရဲ့လက်မောင်းလေးတွေကို အလိုအလျောက်ခွဲထုတ်လိုက်တဲ့အခါ အဆိုပါလက်မောင်းဟာ အခြားကြယ်ငါးတစ်ခုအဖြစ်ပြောင်းလဲသွားပြီး လိုအပ်နေတဲ့ခန္ဓာကိုယ်အစိတ်အပိုင်းတွေကို ပြန်လည်ရရှိမှာဖြစ်ပါတယ်။

ဒီလိုထူးခြားတဲ့ တိရိစ္ဆာန်တွေကို သင်မြင်ဖူးပါသလား..။ အကယ်၍ မိတ်မလိုက်ဘဲမျိုးပွားတဲ့တိရိစ္ဆာန်တွေထဲက အခြားသင်သိတဲ့တိရိစ္ဆာန်တွေရှိရင်လည်း ပြောသွားကြဦးနော်..။