နှစ်ပေါင်း ၂၁၀၀ ကျော်သွားပေမယ့် ထူးထူးခြားခြား မပုတ်မသိုးသေးဘဲရှိနေတဲ့ မမ်မီရုပ်အလောင်း

Lady of Dai လို့ခေါ်တဲ့ တရုတ်အမျိုးသမီးတစ်ဦးရဲ့ ရုပ်အလောင်းဟာ ရှာဖွေတွေ့ရှိဖူးသမျှ မမ်မီရုပ်အလောင်းတွေထဲမှာတော့ အထူးခြားဆုံး ရုပ်အလောင်းပါ။ ဒီရုပ်အလောင်းဟာ နှစ်ပေါင်း ၂၁၀၀ ကျော်သွားပေမယ့် မပုတ်မသိုးဘဲရှိနေသေးတဲ့အပြင် သက်ရှိလူသားတွေလို သူမရဲ့ အသားအရေတွေက ယနေ့အချိန်ထိ နူးညံနေတုန်းပါ။ ဒါတင်မကသေးပါဘူး… လက်နှင့် ခြေထောက်တွေကလည်း ကွေးဆန့်လို့ရပါတယ်။ ပိုပြီးအံ့ဩစရာကောင်းတာက ဆံပင်တွေ ၊မျက်တောင်မွေးတွေရှိနေသေးသလို အတွင်းပိုင်းအူကလီစာနှင့် ကိုယ်ပိုင် Type-A သွေးတွေ မပျက်မစီးဘဲ ရှိနေသေးပါတယ်။  ဒါပေမယ့် ကြောက်တတ်တဲ့ သူတွေဆိုရင်တော့ ဒီရုပ်အလောင်းကို မကြည့်တာက အကောင်းဆုံးပါ။ ဘာဖြစ်လို့လဲဆိုတော့ သူမရဲ့ မျက်နှာအနေအထားက ကြောက်စရာကောင်းနေလို့ပါ။

ဒီအမျိုးသမီးက ဘယ်သူလဲ ၊ ဘာကြောင့် မမ်မီရုပ်အလောင်းအဖြစ်ထားရှိလဲဆိုတာ သမိုင်းကြောင်းကို ပြန်လည်လေ့လာကြည့်တဲ့အခါမှာ Xin Zhui လို့ လူသိများတဲ့ သူမဟာ ဟန်မင်းဆက် (၂၀၆ ဘီစီအီ – ၂၂၀ အေဒီ) လောက်က အလွန်ချမ်းသာကြွယ်ဝတဲ့ Marquis ရဲ့ ဇနီးဖြစ်ခဲ့ပါတယ်။ Xin Zhui ဟာ ရုပ်ရည်ချောမောတဲ့သူဖြစ်ပြီး ပြီးပြည့်စုံတဲ့ ဘဝမှာ နေထိုင်ခဲ့ရပေမယ့် အသက် ၅၀ အရွယ်မှာပဲ ကွယ်လွန်သွားခဲ့ရှာပါတယ်။

သူမရဲ့ ရုပ်အလောင်းကိုတော့ ၁၉၇၁ ခုနှစ်က တရုတ်နိုင်ငံ၊ Hunan ရှိ Mawangdui တောင်ကုန်းတစ်ခု အလုပ်သမားတွေက ရှာဖွေတွေ့ရှိခဲ့တာ ဖြစ်ပါတယ်။ သူမရဲ့ ခေါင်းတလားကို မြေအောက် ၁၂ မီတာအကွာတွေ့ရတာဖြစ်ပြီး ရုပ်အလောင်းအား ပိုးအလွှာ ၂၀ ဖြင့် ထုပ်ပိုးထားတာပါ။ ပြီးတော့ ခေါ်တလားအနီးမှာ ပိုးထည်အဝတ်အထည် ၁၀၀ ၊ တန်ဖိုးကြီး ယွန်းထည် ၁၈၂ ခု ၊ အလှပြင်ပစ္စည်းများ၊  ရေချိုးခန်းသုံး ဗီရိုတစ်ခုနှင့် ကျွန်တွေကို ကိုယ်စားပြုတဲ့ သစ်သားရုပ်တု ၁၆၂ ရုပ်တို့ကိုလည်း တွေ့ရှိခဲ့တယ်လို့ ဆိုပါတယ်။ အဲ့ဒီနောက်ပိုင်း ရုပ်အလောင်းကို စစ်ဆေးကြည့်တဲ့အခါမှာ လုံးဝမပုတ်မသိုးဘဲ ရှိနေတာဖြစ်လို့ ရှေးဟောင်းသုတေသနပညာရှင်တောင့် မယုံနိုင်လောက်အောင် အံ့ဩခဲ့ရပါတယ်။

Source - thesun