ကီလာဖွတ်ဘီလူးတွေကို တွားသွားသတ္တဝါတွေထဲမှာ အဆိုးဆုံးကောင်အဖြစ်တောင် သတ်မှတ်ထားကြပါတယ်။ သူတို့ကျက်စားရာအနီးအနားမှာရှိတဲ့ ဒေသခံတွေရဲ့ရိုးရာပုံပြင်တွေမှာ ကြောက်စရာကောင်းပြီး ရွံရှာစရာကောင်းတဲ့တိရစ္ဆာန်တွေအဖြစ် ဖော်ပြထားကြပါတယ်။ အဆိပ်တွေကို ထွေးထုတ်ခြင်း၊ လေထဲတွင် ခုန်အုပ်ပြီးတိုက်ခိုက်ခြင်း၊ လျှာနဲ့အသားထဲကို ထိုးသွင်းခြင်းနှင့် အဆိပ်ပြင်းတဲ့လေမှုတ်ထုတ်ခြင်းအားဖြင့် လူတွေကို သေစေနိုင်ခြင်းတို့ကြောင့် အန္တရာယ်များတဲ့ တိရစ္ဆာန်တွေအဖြစ် သတ်မှတ်ထားကြတာဖြစ်ပါတယ်။  

ဒီကောင်တွေမှာ လေးလံတဲ့ခန္ဓာကိုယ်ရှိပြီး Osteoderms လို့ခေါ်တဲ့ ပတီးပုံအကြေးခွံတွေနဲ့ ဖုံးအုပ်ထားပါတယ်။ သူတို့ရဲ့အဆိပ်ကို အောက်ဖက်မေးရိုးမှာရှိတဲ့ အတန်းလိုက်ဂလင်းတွေထဲက ထုတ်ပေးတာပါ။ ဒီဖွတ်ကောင်တွေအကိုက်ခံရတဲ့အခါ အဆိပ်တွေဟာ သူတို့ရဲ့သေးငယ်တဲ့သွားလေးတွေကတစ်ဆင့် ကူးစက်ပါတယ်။ အကိုက်ခံရတဲ့အခါ သူတို့ကိုလွယ်လွယ်ခွာချလို့မရပါဘူး။ အသားအတွင်းထဲထိ အဆိပ်တွေစိမ့်နေအောင်ကိုက်ဖြတ်တတ်ပြီး စက္ကန့်အတော်ကြာအောင် ထိန်းထားတတ်ကြပါတယ်။ 

သူတို့က လူတွေကိုကိုက်လိုက်တဲ့အခါ အရမ်းနာကျင်ပြီး သေစေနိုင်ပါတယ်။ ဒါပေမယ့် သူတို့ဟာ လူနှင့် အခြားကြီးမားတဲ့တောရိုင်းတိရစ္ဆာန်တွေကို ရှောင်လေ့ရှိပါတယ်။ သားကောင်တွေကို အန္တရာယ်မပေးခင် ပါးစပ်ကိုကျယ်ကျယ်ဖွင့်ပြီး နှောင့်ယှက်ခြင်းဖြင့် သတိပေးတတ်ကြပါတယ်။ သင့်အနေနဲ့ သူတို့ကို ထိပ်တိုက်တွေ့ခဲ့ရင် အမြန်ဆုံးရှောင်ဖို့တော့ လိုအပ်ပါတယ်။ 

ကီလာဖွတ်ဘီလူးတွေဟာ တောထဲမှာ နှစ် ၂၀ ခန့်သာ အသက်ရှင်ကြပေမယ့် သေချာစောင့်ရှောက်မယ်ဆိုရင် နှစ် ၃၀ ကျော် အသက်ရှင်နိုင်ပါတယ်။ ၂၁.၅ လက်မခန့်ရှည်ပြီး အလေးချိန် ၁.၅-၃ ပေါင်အထိရှိပါတယ်။