ကြက် ၊ ဝက် အသားများနှင့် ဆက်သရတဲ့ ကရင်ရိုးရာ နတ်စားခြင်းဓလေ့

ကရင်လူမျိုးများမှာ ယနေ့အချိန်ထိ မျိုးရိုးစဥ်ဆက် လက်ဆင့်ကမ်း ပြုလုပ်ကြတဲ့ ရိုးရာပွဲတော်တစ်ခု ရှိပါတယ်။ ဒါကတော့ မိရိုးဖလာ လုပ်ကိုင်လာကြတဲ့ နတ်စားပွဲတော် (နတ်စားခြင်း) ဓလေ့ပါ။ ရိုးရာနတ်စားခြင်းကို ကရင်လူမျိုးအားလုံး ကျင်းပကြတာတော့ မဟုတ်ပါဘူး ဗုဒ္ဓဘာသာကိုးကွယ်သူများသာ ဒီပွဲတော်ကို ကျင်းပကြတာ ဖြစ်ပါတယ်။

နတ်စားရာမှာလည်း အများသောအားဖြင့် မနက်အစောပိုင်းမှာ ကြက်ဖို၊ ကြက်မ နှစ်ကောင်ပြုလုပ်စားကြပြီး နေ့လယ်ပိုင်းမှာ ဝက် ဖြင့်ပြုလုပ်ကြတာ ဖြစ်ပါတယ်။ နတ်စားလို့ပြီးသွားရင်လည်း နတ်ဆက်သထားတာတွေကို အနီးအနားရှိနေအိမ်များအား ခွဲဝေလှူဒါန်းကြသလို နေအိမ်ကိုလာရောက်ကြသူတွေကိုလည်း တပျော်တပါး ကြွေးမွေးဧည့်ခံကြပါတယ်။

ပြေလည်တဲ့ မိသားစုအချို့ကတော့ နတ်စားခြင်းကို ၁ နှစ်မှတစ်ကြိမ် ပြုလုပ်ကြပေမယ့်မပြေလည်တဲ့ မိသားစုများကတော့ ၃ နှစ်မှ တစ်ကြိမ်သာပြုလုပ်ကြတာ ဖြစ်ပါတယ်။ ဒါပေမယ့်ရိုးရာနတ်စားခြင်းဟာ တကယ့်တော့ မလွယ်ကူလှတဲ့ ဓလေ့တစ်ခုပါ.

တစ်ခုခု အလွဲလွဲချော်ချော်ဖြစ်သွားခဲ့ရင် ပွဲပျက်တတ်တယ်လို့ ယုံကြည်ထားကြပါတယ်။ နတ်စားမယ့် ဝက်ကိုလည်း ငယ်ငယ်လေးကတည်းက နေအိမ်မှာ အမွှေးနံသာများ ပတ်ဖြန့်ပေးပြီး အမိုးနဲ့ ဖထီကို တိုင်တည်ထားရတာ ဖြစ်ပါတယ်။

နတ်စားခြင်းကို မိသားစုတစ်စုမှာ သွေးသားတော်စပ်မှု မရှိတဲ့ ချွေးမ၊ သားမက် အစရှိတဲ့သူများကလွဲပြီး မိဘ၊ သားသမီး၊ မြေး၊ မြစ် အစရှိတဲ့ ဆွေမျိုးတော်စပ်သူများသာ ပါဝင်ခွင့်ရတာ ဖြစ်ပါတယ်။ ရိုးရာ နတ်စားကြသူ များမှာ ဗမာကရင်၊ တလိုင်းကရင်ဆိုပြီး ကွဲပြားမှုရှိပေမယ့် လုပ်နည်းလုပ်ဟန် ၊ အခေါ်အပြောများက အနည်းငယ်ကွားခြားမှုရှိပါတယ်။

ရိုးရာ နတ်စားခြင်းကို ရှေးဘိုးဘွားစဥ်ဆက်များက အဝေးရောက်နေတဲ့ မိသားစုဝင်များနဲ့ တစ်စုတစ်စည်းထဲ ပြန်လည်စုံတွေ့နိုင်ဖို့ ရည်ရွယ်ပြီး ပြုလုပ်ခဲ့ကြတဲ့ ဓလေ့တစ်ခုပါ။ ဒါပေမယ့် ဒီဘက်ခေတ်မှာတော့ နတ်စားခြင်းကို မိသားစုများက စီးပွားရေး နှင့် ကျန်းမာရေးကောင်းမွန်အောင်ရည်ရွယ်ကာ တိုင်တည်ပြုလုပ်ကြတာ ဖြစ်ပါတယ်။

အချို့မှာရိုးရာနတ်စားခြင်းကို မဖြစ်မနေ ပြုလုပ်ရတဲ့အခါလည်း ရှိတတ်ကြသလို နတ်မစားပါကလည်း ကျန်းမာရေးချို့ယွင်းခြင်း ၊ စီးပွားရေး ဆုံးရှုံး ပျက်စီးခြင်းများဖြစ်တတ် ကြောင်း ယုံကြည်ထားကြပါတယ်။

Photo Credit -Sa Aing Htee Khant

Source - Own Creation (ZM)