ဒေါင်းဆင်ဒရုန်းဖြစ်စေတဲ့ အကြောင်းအရင်းတွေကို မပြောခင် ဒေါင်းဆင်ဒရုန်းက ဘာလဲဆိုတာကို အရင်ဆုံးပြောပြပါမယ်။
ဒေါင်းဆင်ဒရုန်းရောဂါဆိုတာ တစ်သက်တာရောဂါဖြစ်ပြီး ရောဂါခံစားရသူရဲ့ သက်တမ်းကိုလည်း တိုစေပါတယ်။ ဒေါင်းဆင်ဒရုန်းရောဂါရဲ့ ရောဂါလက္ခဏာတွေကတော့ မျက်နှာပြားခြင်း၊ ဦးခေါင်းနဲ့ နားရွက်သေးငယ်ခြင်း၊ လည်ပင်းတိုခြင်း၊ လျှာအပြင်ထွက်ခြင်း၊ မျက်လုံးအထက်ကိုစောင်းနေခြင်း၊ ပုံမှန်မဟုတ်တဲ့နားရွက်ရှိခြင်း နဲ့ ကြွက်သားများပျော့နေခြင်းတို့ပဲဖြစ်ပါတယ်။
ဒေါင်းဆင်ဒရုန်းရောဂါဖြစ်စေတဲ့ အကြောင်းကတော့ မိဘနှစ်ပါးရဲ့ မျိုးရိုးဗီဇတွေဆိုတာက သူတို့ရဲ့ သားသမီးတွေဆီကို လက်ဆင့်ကမ်းပါတယ်။ အဲ့ဒီ ဗီဇကိုတော့ ခရိုမိုဆုန်းက သယ်ဆောင်ပေးပြီး ကလေးရဲ့ ဆဲလ်တွေ ဖွံ့ဖြိုးလာတဲ့အချိန်မှာတော့ အမေဆီလာတဲ့ ခရိုမိုဆုန်းတစ်ဝက်နဲ့ အဖေကလာတဲ့ ခရိုမိုဆုန်းတစ်ဝက် စုစုပေါင်း ခရိုမိုဆုန်း ၄၆ ခုရှိသင့်ပါတယ်။
အဲ့ဒီခရိုမိုဆုန်းတွေထဲက ၂၁ ခုမြောက် ခရိုမိုဆုန်းက ပုံမှန်မဟုတ်တဲ့အခါမှာတော့ ရုပ်ပိုင်းဆိုင်ရာ၊ စိတ်ပိုင်းဆိုင်ရာ ဖွံ့ဖြိုးမှုနှောင့်နှေးခြင်း နဲ့ မသန်စွမ်းခြင်းတွေဖြစ်လာပြီး ဒေါင်းဆင်ဒရုန်းရောဂါဖြစ်လာပါတော့တယ်။ မိခင် အသက်ကြီးမှ မွေးတဲ့ကလေးတွေဟာ ဒေါင်းဆင်ဒရုန်းရောဂါ ပါလာနိုင်ခြေများပြီး တကယ်လို့ မိခင်ဖြစ်သူက ဒေါင်းဆင်ဒရုန်းရောဂါပါတဲ့ ကလေးမွေးဖူးခဲ့မယ်ဆိုရင်တော့ နောက်မွေးလာမယ့်ကလေးတွေကလည်း ဒေါင်းဆင်ဒရုန်းရောဂါပါလာနိုင်ခြေများပါတယ်။
ဒေါင်းဆင်ဒရုန်းရောဂါရှိတဲ့ မွေးကင်းစကလေးဟာ ပုံမှန်အရွယ်အစားနဲ့ မွေးဖွားလာနိုင်ပေမယ့် ခန္ဓာကိုယ် ဖွံ့ဖြိုးတိုးတက်မှုနှုန်းကတော့ သာမန်ကလေးတွေထက် နှေးကွေးပါတယ်။
ဒေါင်းဆင်ဒရုန်းရောဂါဆိုတာ ကုသလို့မရတဲ့ ရောဂါဖြစ်ပေမယ့် ဆေးဘက်ဆိုင်ရာ တိုးတက်မှုတွေလည်း ရှိလာတာကြောင့် ဒေါင်းဆင်ဒရုန်း ရှိသူများနဲ့ သူတို့ရဲ့ မိသားစုတွေအတွက် ကူညီပံ့ပိုးမှုတွေပေးတဲ့ အဖွဲ့အစည်းများစွာရှိနေပါပြီ။ ဒါကြောင့် ဒေါင်းဆင်ဒရုန်း ရောဂါအခြေအနေရဲ့ စိန်ခေါ်မှုတွေကို ကျော်လွှားနိုင်ဖို့အတွက် အခွင့်အလမ်းများစွာရှိနေပြီ ဖြစ်ပါတယ်။
source - cdc
Bong I.T