ဒီဒေးကြော်ငြာပြီးတဲ့ရက်တည်းကစကာ တိုက်ပွဲတွေလည်း ပြင်းထန်လာနေသလို နေရာအနှံ့မှာလည်း ဖိနှိပ်ဖမ်းဆီးမှုတွေ အများအပြားဖြစ်ပေါ်နေတာကို တွေ့ရပါတယ်။ မြို့ပေါ်ဒေသတွေမှာလည်း ပြည်သူတွေက သပိတ်တိုက်ပွဲတွေဆင်နွှဲနေကြသလို ဖောက်ခွဲမှုတွေနဲ့အတူ တော်လှန်ရေးတိုက်ပွဲတွေကို စတင်ပြီးလုပ်ဆောင်နေပြီပဲဖြစ်ပါတယ်။
စစ်ကိုင်း၊ မုံရွာနဲ့ ကနီဘက်တွေမှာဆိုရင်လည်း တိုက်ပွဲတွေဟာ နေ့တိုင်းလိုလိုဖြစ်နေပြီး အင်အားအလုံးအရင်းနဲ့ချေမှုန်းခံနေရတာလည်းဖြစ်ပါတယ်။ အခုလို တိုက်ပွဲတွေပြင်းထန်လာတာကြောင့် အင်တာနက်ဖြတ်တောက်မှုတွေစတင်လုပ်ဆောင်နေပြီး ဒီကနေ့ စက်တင်ဘာလ ၁၄ရက်နေ့ နေ့လည်ပိုင်းမှစတင်ကာ အင်တာနက်ဖြတ်တောက်ခံရတဲ့ မြို့အချို့ပါရှိလာနေပြီကို သိရပါတယ်။
စစ်ကိုင်းတိုင်းရှိ ကနီ၊ ပုလဲ၊ ဘုတလင်၊ ယင်းမာပင်၊ အရာတော်မြို့တွေနဲ့ မန္တလေးတိုင်းရှိ မိုးကုတ်၊ မြင်းခြံမြို့တွေအပြင် မကွေးတိုင်းရှိ တောင်တွင်းကြီးမြို့နယ်တွေမှာ အင်တာနက်ပြတ်တောက်မှုတွေဖြစ်ပေါ်နေပြီလို့ သိရပါတယ်။ စစ်ကိုင်းတိုင်းကရွာအချို့မှာ အင်တာနက်ပြတ်တာနဲ့အပြိုင် ရွာတွေကို မီးရှို့တာတွေပါလုပ်ဆောင်နေတာတွေရှိတယ်လို့လည်း သိရပါတယ်။
သတင်း အရင်းအမြစ်៖ Myanmarload