မိုးတွင်းကာလမှာ သဘာဝ ဘေးအန္တရာယ်တွေကို ကြုံတွေ့ကြရတာ နှစ်စဉ် နှစ်တိုင်းပါပဲ ။ ဒီရက်ပိုင်းမှာဆိုရင်လည်း တောင်တန်း ဒေသတွေမှာ မိုးအဆက်မပြတ် ရွာသွန်းမှုကြောင့် ရေကြီး ရေလျှံတာတွေ ၊ မြေပြိုကျတာတွေကို ဒေသခံတွေ အနေနဲ့ ရင်ဆိုင် နေကြရပါတယ် ။ ဒီလို အခြေအနေတွေမှာ စားဝတ်နေရေးအတွက်လည်း ခက်ခဲကြသလို အချို့ဆို သဘာဝဘေးအန္တရာယ်ကြောင့် အသက်ဆုံးရှုံးရတာတွေတောင် ရှိခဲ့တာ စိတ်မကောင်းစရာပါပဲ ။
ဒါကြောင့် ပရဟိတအသင်းတွေ ၊ ရဟန်းသံဃာတွေပါမက ပြည်မက ပြည်သူတွေကလည်း ဒီလို အဖြစ်တွေကို မြင်တွေ့ရပြီး လူနာချင်း ကိုယ်ချင်းစာနာတာကြောင့် လှူဒါန်းမှုတွေ ပြုလုပ်ပေးလျက်ရှိပါတယ် ။ ငွေအများကြီး မတတ်နိုင်တဲ့ အချို့ကလည်း အလှူငွေများ စုပေါင်းကောက်ခံကာ လှူဒါန်းကြတာကိုတွေ့ရပါတယ် ။မြန်မာတွေရဲ့ သဒ္ဓါတရား ထက်သန်ပုံကတော့ အလှူပို့စ်လေး တစ်ခုတင်လိုက်တာနဲ့ နည်းသည် များသည် သဘောမထားဘဲ ဝိုင်းဝန်းလှူဒါန်းကြတဲ့ မြင်ကွင်းတွေက ကြည်နူးပီတိဖြစ်စရာပါပဲ။
အခုလည်း ပရဟိတ အလုပ်တွေကို လုပ်ဆောင်ပေးနေတဲ့ ဆရာတော်တစ်ပါးက မွန်ပြည်နယ် ကျိုက်မရော မြို့နယ်မှာ ရေးဘေးဒဏ်ကြောင့် ပျက်စီးသွားတဲ့ စာသင်ကျောင်းများကို ပြန်လည် ပြုပြင်ရန် အတွက် အလှူငွေများကို မိုးရေထဲ တစ်ကျောင်းပြီး တစ်ကျောင်း လိုက်လံ လှူဒါန်းပေးခဲ့တာကို တွေ့ရပါတယ် ။ တစ်ချို့နေရာတွေဆိုရင် ရေမကျသေးတာကြောင့် လှေနဲ့ ခက်ခဲစွာ သွားရောက် လှူဒါန်းနေတာကို တွေ့ရပါတယ် ။ ဆရာတော် ဘုရားရဲ့ ပရဟိတ စိတ်ကို လေးစား မိတာကြောင့် ပရိသတ်ကြီး အတွက် ပြန်လည်ဖော်ပြပေးလိုက်ပါတယ် ။