ဖေဖော်ဝါရီ (၁) ရက်နေ့ထဲက စတင်ခဲ့တဲ့ နွေဦးတော်လှန်ရေးကြီးကတော့ အချိန်သုံးလအတွင်းမှာ အသက်ပေးသွားကြသူတွေလည်းများပြားခဲ့သလို ဖမ်းဆီးထိန်းသိမ်းခံရသူတွေလည်းထောင်ချီရှိခဲ့ပြီဖြစ်ပါတယ်။ ခုဆိုရင် မြန်မာနိုင်ငံအတွင်းမှာ နေထိုင်ကြတဲ့ တိုင်းရင်းသားလူမျိုးစုံကလည်း ဒီလှုပ်ရှားမှုကြီးမှာ အင်တိုက်အားတိုက် ပါဝင်အားဖြည့်ပေးနေကြတာလည်းဖြစ်ပါတယ်။စည်းစည်းလုံးလုံးနဲ့ တစ်ယောက်ကိုတစ်ယောက်ကူညီဖေးမရင်း အခက်အခဲတွေကို ရင်ဆိုင်ကာ ယုံကြည်ချက်ပန်းတိုင်ကို လျှောက်လှမ်းနေကြရတာပါ။
နေ့စဉ်တိုင်း မရိုးနိုင်တဲ့ လှုပ်ရှားမှုမျိုးစုံကို နေရာအနှံ့အပြားမှာ ပြုလုပ်ရင်း ငြိမ်းချမ်းစွာ ဆန္ဒထုတ်ဖော်နေကြတာလည်းဖြစ်ပါတယ်။ဒီရက်ပိုင်း မြို့ကြီးတွေမှာဆိုရင်လည်း သပိတ်စစ်ကြောင်းတွေကို အားအင်အပြည့်နဲ့ မြို့နယ်အသီးသီးမှာ ပြန်လည်လှုပ်ရှားလာကြတာကိုတွေ့မြင်ရပါတယ်။ ခုဆိုရင် ကျောင်းဖွင့်ရာသီကိုရောက်ရှိလာပြီဖြစ်တာကြောင့် ကျောင်းသူကျောင်းသားတွေအများစုက ခုလိုကာလမှာ ကျောင်းမတက်ရောက်နိုင်ကြောင်း စစ်ကျွန်ပညာအလိုမရှိ သပိတ်တွေကိုလည်း လှုပ်ရှားလျက်ရှိပါတယ်။
မေလ (၅) ရက်နေ့မှာဆိုရင်လည်း ဖားကန့်က ကျောင်းသူကျောင်းသာတွေစုပေါင်းပြီး ရင်ထဲကဆန္ဒတွေကို ဖန်တီး သရုပ်ဖော်ရင်း စစ်ကျွန်ပညာရေး အလိုမရှိသပိတ်ကို လှုပ်ရှားခဲ့ကြပါတယ်။ ဒါ့အပြင် လူငယ်တွေကိုယ်စီဆိုင်းဘုတ်များကိုင်ဆောင်ကာ လမ်းလျှောက်သပိတ်ကိုလည်း အင်အားများစွာနဲ့ချီတက်လှုပ်ရှားခဲ့တယ်လို့လည်းသိရပါတယ်။လူငယ်တွေကတော့ ရရာနေရာတွေကနေပါဝင်လှုပ်ရှားနေကြတာ လေးစားစရာပါပဲ။ပရိသတ်ကြီးအတွက် ဖားကန့်က လူငယ်တွေရဲ့ သပိတ်ပုံရိပ်တွေကို မျှဝေပေးလိုက်ပါတယ်။