မေလ(၂)ရက်နေ့ ကမ္ဘာလုံးဆိုင်ရာ နွေဦးတော်လှန်ရေးနေ့မှာ အရမ်းစည်ကားလှတဲ့ တိုကျိုမြို့ပေါ်က လမ်းလျှောက်ချီတက်ပွဲ

အခုရက်ပိုင်းမှာဆိုရင်တော့ ပြည်သူတွေလည်း စည်းစည်းလုံးလုံးနဲ့ လမ်းပေါ် ပြန်ထွက်လာကြပြီး လူထုလှုပ်ရှားမှုတွေကို အင်အားအပြည့်ဆောင်ရွက်နေကြတာ ဖြစ်ပါတယ်။ပြည်သူတွေက အရာရာကိုစွန့်လွှတ်အနစ်နာခံရဲကြတာကြောင့် (၃)လကျော်ကြာသွားပြီဖြစ်တဲ့ ဒီအခြေအနေကို တောင့်ခံနေကြဆဲပဲဖြစ်ပါတယ်။လူထုလှုပ်ရှားမှုတွေမှာဆိုရင် လူကြီး၊လူငယ် မရွေး ပါဝင်အားဖြည့်ပေးကြပြီး တစ်ယောက်ကိုတစ်ယောက် ကာကွယ်စောင့်ရှောက်ပေးကြရင်းနဲ့ပဲ ရှေ့သို့လျှောက်လှမ်းနေကြတာဖြစ်ပါတယ်။

ဒီနေ့ မေလ(၂)ရက်နေ့မှာတော့ ပြည်သူတွေအကုန်လုံးက ပြည်လုံးကျွတ်ဆန္ဒထုတ်ဖော်ကြဖို့အတွက် စီစဉ်ထားကြတာဖြစ်ပါတယ်။ဒါ့ကြောင့် ပြည်ပကိုရောက်ရှိနေကြတဲ့ မြန်မာလူမျိုးတွေကပါ တစ်ထောင့်တစ်နေရာကနေ ပါဝင်အားဖြည့်ပေးနေကြတာဖြစ်ပါတယ်။အခုဆိုရင်လည်း ဂျပန်နိုင်ငံ၊တိုကျိုမြို့မှာ အလုပ်လုပ်ကိုင်နေသူတွေနဲ့ မြန်မာကျောင်းသား၊ကျောင်းသူတွေက အင်္ကျီအနက်ရောင်တွေ ဆင်တူဝတ်ဆင်ကြပြီး လမ်းမပေါ်မှာ အားမာန်အပြည့်နဲ့လမ်းလျှောက်ချီတက်နေကြတာ ဖြစ်ပါတယ်။

အခုလိုမျိုး မိမိတို့ရဲ့အမိမြေအတွက် ပြည်တွင်းက မြန်မာပြည်သူလူထုနဲ့အတူ တစ်သွေးတည်း၊တစ်သားတည်းရပ်တည်ပေးနေကြလို့ အားတက်စရာကောင်းလှပါတယ်။ဂျပန်နိုင်ငံအပြင် တခြားနိုင်ငံအသီးသီးမှာ ရောက်ရှိနေကြတဲ့ မြန်မာလူမျိုးတွေကလည်း ဒီနေ့မှာ တစ်တပ်တစ်အားလှုပ်ရှားနေကြတာပဲဖြစ်ပါတယ်။ပြည်တွင်း၊ပြည်ပမှာနေထိုင်ကြတဲ့ မြန်မာပြည်သူတွေက အရေးအကြောင်းဆိုရင် အချင်းချင်းရိုင်းပင်းကူညီကြတာဖြစ်လို့ တိုကျိုမြို့ပေါ်က လမ်းလျှောက်ချီတက်ပွဲပုံရိပ်တွေကို ပြန်လည်မျှဝေပေးလိုက်ပါတယ်။

Source&Photo Credit: Original Uploder