မြန်မာနိုင်ငံ နေရာအရပ်ရပ်မှာနေထိုင်ကြတဲ့ ပြည်သူအားလုံးဟာ ခုဆိုရင် ကိုယ့်နိုင်ငံအတွက် အစွမ်းကုန် ကြိုးစားအားထုတ်ပြီး တာဝန်ကျေပွန်ပေးနေကြတာဖြစ်ပါတယ် ။စည်းစည်းလုံးလုံးနဲ့ ရရာနေရာတွေကနေ ဆန္ဒထုတ်ဖော်မှုတွေကို ငြိမ်းချမ်းစွာပြုလုပ်လျက်ရှိတာကို တွေ့မြင်ရပါတယ်။ဒီလှုပ်ရှားမှုတွေမှာ အဓိကပါဝင်ကြတဲ့ လူငယ်မျိုးဆက်သစ်လေးတွေရဲ့ တီထွင်နိုင်မှုတွေကလည်း တကယ်ကို လေးစားစရာကောင်းလွန်းတာ အမှန်ပါပဲ။
မရိုးနိုင်တဲ့ နည်းလမ်းတွေကို အသုံးချကာ ဆန္ဒထုတ်ဖော်မှုမြင်ကွင်းတွေကပဲ နိုင်ငံတကာရဲ့ သတင်းတွေ Twitter တွေထိ ရောက်ရှိခဲ့တာလည်းဖြစ်သလို အားလုံးကလည်း ချီးကျူးခဲ့ကြတာပါ။ခုဆိုရင် လမ်းမပေါ်ထွက်ကာ ဆန္ဒထုတ်ဖော်ရန်မလွယ်ကူတာကြောင့် မိမိတို့နေထိုင်ရာ မြို့နယ်တွေမှာပဲ ပြည်သူအားလုံးဟာ ညီညီညွတ်ညွတ် လှုပ်ရှားမှုတွေပြုလုပ်နေကြတာလည်းတွေ့ရပါတယ်။
ဒီနေ့ထိ အပစ်အခတ်တွေ ဖမ်းဆီးမှုတွေ နေရာတိုင်းမှာရှိနေပေမယ့် ပြည်သူအားလုံးက လက်မလျော့သွားဘဲ ယုံကြည်ချက်တွေအတွက် ရှေ့ဆက်တိုးနေကြတာလည်းဖြစ်ပါတယ်။ဘားအံမြို့မှာဆိုရင်လည်း ပြည်သူများဟာ ရောင်စုံစက္ကူတွေနဲ့ ဒေါင်းအရုပ်လေးတွေများစွာဖန်တီးကာ မိမိတို့ရင်ထဲကခံစားချက်တွေကို ရေးသားဖော်ပြရင်း ဒေါင်းသပိတ်ကို လှုပ်ရှားခဲ့ကြတာကိုတွေ့မြင်ရပါတယ်။တကယ်ကို ရရာနေရာတွေကနေ ပါဝင်နေကြတာ လေးစားစရာပါပဲနော်။