ထူးဆန်းဖြစ်စဥ်တွေ အမြဲတစေကြုံတွေ့နေရတဲ့ သမုဒ္ဒရာရေပြင်ကြီးထဲမှာ အခုလည်းနောက်ထပ် အံ့ဩဖို့ကောင်းလွန်းတဲ့ ဖြစ်ရပ်တစ်ခုထပ်ဖြစ်နေပါပြီ။ပင်လယ်ပြင်အောက်မှာရှိနေတဲ့ မီးတောင်တစ်ခုစတင်ပေါက်ကွဲလာတာပါ။ရေပြင်ထဲမှာမီးတောင်ပေါက်တာက သိပ်မထူးဆန်းဘူးလို့ပြောလို့ရပါဦးမယ်။အဲ့ဒီမီးတောင်ထဲကနေ ငါးမန်းတွေပါထွက်လာတာကတော့ အရမ်းထူးဆန်းပြီး ရုပ်ရှင်ပါဆန်သွားပါပြီ။
သိပ္ပံပညာရှင်တွေရဲ့ပြောပြချက်နဲ့ နာဆာရဲ့ထုတ်ပြန်ချက်အရ ပစိဖိတ်သမုဒ္ဒရာ ဆော်လမွန်ကျွန်းစုထဲမှာရှိနေတဲ့ ကာဗာချီမီးတောင်ဟာ စတင်ပေါက်ကွဲလာပြီလို့သိရပါတယ်။နာဆာဂြိုလ်တုကရိုက်ယူရရှိတဲ့ ဓာတ်ပုံတွေအရ မီးခို့ငွေ့တွေ၊ပြာမှုန့်တွေသာမက မီးတောင်ထဲမှာနေထိုင်ကြတဲ့ ငါးမန်းမျိုးစိတ်တွေပါ အပြင်ထွက်လာကြတာကိုတွေ့ရပါတယ်။
တကယ်တော့ငါးမန်းမျိုးစိတ်နှစ်ခုလောက် အဲ့ဒီမီးတောင်ဝနားမှာနေထိုင်ကြတာကို ၂၀၁၅ ခုနှစ်တည်းကတွေ့ရှိခဲ့ရတာဖြစ်ပါတယ်။ရေမျက်နှာပြင်အောက်ကနေ ၆၅ ပေလောက်အကွာအဝေးမှာရှိနေတဲ့ မီးတောင်ဝနားမှာ အက်ဆစ်တွေ၊ရေပူတွေနဲ့ ဆာလဖာအရည်တွေပျော်ဝင်နေတာကြောင့် အဲ့ဒီနားမှာငါးမန်းတွေနေနိုင်တာဟာ အံ့ဩစရာကောင်းပါတယ်။နေထိုင်တဲ့ငါးမန်းမျိုးစိတ်တွေကတော့ တူခေါင်းငါးမန်းနဲ့ ဆစ်ကီငါးမန်းတို့ဖြစ်ပါတယ်။
ကာဗာချီမီးတောင်ဟာ ပစိဖိတ်သမုဒ္ဒရာအောက်က မီးတောင်တွေထဲမှာ Active အဖြစ်ဆုံးမီးတောင်တွေထဲကတစ်ခုပါ။မီးတောင်ဟာ မနှစ်ကတည်းက စတင်လှုပ်ရှားနေခဲ့ကာ ရေတွေအရောင်ပြောင်းနေခဲ့ပြီး အခုတော့တကယ်ထပေါက်လာပါပြီ။ချော်ရည်တွေ ပင်လယ်ရေမျက်နှာပြင်အထိ လျှံတက်တာမျိုးတော့မရှိပေမဲ့ ပတ်ဝန်းကျင်တဝိုက်မှာတော့ မီးခိုးတွေနဲ့ပြည့်နှက်နေပါတယ်။ကာဗာချီဟာ ၂၀၀၇ နဲ့ ၂၀၁၄ ခုနှစ်တုန်းကလည်း အကြီးအကျယ်ပေါက်ကွဲဖူးပြီး မှတ်တမ်းတင်နိုင်ခဲ့တဲ့ အစောဆုံးပေါက်ကွဲမှုကတော့ ၁၉၃၉ တုန်းကပေါက်ကွဲမှုဖြစ်ပါတယ်။