ပြီးခဲ့တဲ့စနေနေ့က နယူးယောက်မြို့တော်မှာကျင်းပခဲ့တဲ့ ဘရွတ်ကလင်မာရသွန်ဝက်အပြေးပြိုင်ပွဲမှာ ဝင်ရောက်ယှဥ်ပြိုင်သူတစ်ဦးဟာ ပန်းဝင်ခါနီးနားလေးမှာ သေဆုံးခဲ့ရတယ်လို့ အာဏာပိုင်တွေကပြောကြားခဲ့ပါတယ်။ဘရိုက်တန်ကမ်းခြေရိပ်သာမှာကျင်းပတဲ့ ၁၃ မိုင်ကျော်ထိပြေးရတဲ့ပြိုင်ပွဲမှာ အသက် ၃၀ အရွယ်ရှိအမျိုးသားတစ်ဦးက ပြိုင်ပွဲချိန်မနက်ကိုးနာရီလောက် ပန်းဝင်ခါနီးမှာ သတိလစ်လဲကျသွားခဲ့တာပါ။
အပြေးပြိုင်ပွဲကိုတည်ထောင်တဲ့ New York Road Runner(NYRR) အဖွဲ့အစည်းက သေဆုံးသူဟာပန်းမဝင်ခင်လေးမှာသတိလစ်လဲကျသွားတာဖြစ်ကြောင်း၊ဆေးအကူချက်ချင်းပေးခဲ့ပြီး နီးစပ်ရာ ကိုနေကျွန်းဆေးရုံကိုပို့ခဲ့ပေမဲ့ သေဆုံးသွားခဲ့ကြောင်း ထုတ်ပြန်ခဲ့ပါတယ်။ရဲဌာနရဲ့ပြောရေးဆိုခွင့်ရှိသူက သေဆုံးရတဲ့အကြောင်းရင်းကို အတိအကျမပြောနိုင်ပေမဲ့ နှလုံးအမောဖောက်တာနဲ့ပတ်သက်တာတစ်ခုခုဖြစ်နိုင်ကြောင်း ပြောကြားခဲ့ပါတယ်။
နယူးယောက်မီးသတ်ဌာနရဲ့အဆိုအရ တခြားပြိုင်ပွဲဝင် ၁၆ ယောက်လောက်ကိုလည်း ဆေးရုံပို့ပေးခဲ့ရပြီး ငါးယောက်လောက်ဟာ ဒဏ်ရာပြင်းပြင်းထန်ထန်ရရှိနေခဲ့ပါတယ်။NYRR ကတော့ခုလိုဖြစ်ခဲ့ရတာအတွက်စိတ်မကောင်းကြောင်း၊သေဆုံးသူရဲ့မိသားစုတွေနဲ့ နီးစပ်သူတွေအတွက်ပါ ဆုတောင်းပေးလျက်ရှိကြောင်းထုတ်ပြန်ခဲ့ပြီး ပြိုင်ပွဲအချိန်အတွင်းက ရာသီဥတုအခြေအနေနဲ့ အပူချိန်အခြေအနေတွေကို သေချာပြန်လည်လေ့လာနေကြောင်းထုတ်ပြန်ထားပါတယ်။
လွန်ခဲ့တဲ့ ၂၀၁၄ ခုနှစ်ကလည်း ဒီနေရာ၊ဒီပြိုင်ပွဲမှာပဲ အပြေးသမားတစ်ယောက် သေဆုံးဖူးပါတယ်။အဲ့တုန်းကတော့ အသက် ၃၁ နှစ်အရွယ်ရှိအမျိုးသားတစ်ယောက် ပန်းဝင်ပြီးပြီးချင်းမှာ လဲကျသေဆုံးခဲ့တာပါ။