ဧရာဝတီတိုင်းဒေသကြီးအတွင်း ပြည်ပပို့ကုန်အဖြစ် တစ်ခုပါဝင်တဲ့ ဆံပင်စျေးကွက်ဟာ လတ်တလောမှာ အတော်လေး မြင့်တက်လာခဲ့ပြီး လက်ရှိမှာ ဆံပင်ရောင်းဝယ်လုပ်သူများပိုမိုပေါများနေတယ်လို့သိရပါတယ်။

လက်ရှိ ဆံပင်ရောင်းဝယ်ရေးဈေးကွက်မှာ ဆံပင် တစ်ပိဿာကို အတိုအရှည်ပေါ်မူတည်ကာ ငွေကျပ် နှစ်သိန်းခွဲ မှ ငွေကျပ် သိန်း (၂၀)ဝန်းကျင်အထိ အရောင်းအဝယ်ဖြစ်နေကြောင်း ဧရာဝတီတိုင်းဒေသကြီး ၊ ပုသိမ်မြို့ရှိ ဆံပင်ရောင်းဝယ်ရေးလုပ်ငန်းရှင်များထံမှ သိရပါတယ်။

ဆံပင်စျေးကွက်မှာ ယခင်က မူဆယ်မှတစ်ဆင့် တရုတ်နိုင်ငံသို့သာအဓိက တင်ပို့ရောင်းချမှုရှိခဲ့သော်လည်း ယခုနှစ်ပိုင်းမှာ စျေးကွက်ပြောင်းလဲသွားခဲ့ပြီး ပြည်တွင်းမှာနေထိုင်နေကြတဲ့ ပြည်ပနိုင်ငံသားများနှင့် ပြည်ပနိုင်ငံများရှိ အဝယ်ဒိုင်သို့ တိုက်ရိုက်ချိတ်ဆက်ကာ ဝယ်ယူနေကြတာဖြစ်တယ်လို့​ သိရပါတယ်။