ရှမ်းနဲ့ ကရင်မှာ ထိုင်းဝက်အူချောင်းစားမိတဲ့ ကလေးတွေ ဆေးရုံတက်ရတဲ့သတင်းထွက်ပြီး အစိုးရမှ မစားရန် တားမြစ်ချက် ထုတ်ပြန်

ဇန်နဝါရီ ၃၀ ရက်နေ့တည်းက ရန်ကုန်က ကလေးအထူးကုဆရာဝန်တစ်ဦးက ကိုရီးယားထုတ် ဝက်အူချောင်းစားမိတဲ့ ကလေးအချို့ နေမကောင်းဖြစ်ပြီး ဆေးရုံရောက်တဲ့အကြောင်း Facebook မှာ တက်လာခဲ့ပါတယ်။ ဒီရောဂါဟာ အဲဒီ ဝက်အူချောင်းတွေမှာ ကြာရှည်ခံအောင် ထည့်ထားတဲ့ နိုက်ထရိတ်ဆိုတဲ့ ဓာတ်ပစ္စည်းကြောင့် ကလေးရဲ့ သွေးထဲမှာ အောက်ဆီဂျင် လျော့နည်းစေတာပဲ ဖြစ်ပါတယ်။

အဲဒီကတည်းက ဒီရောဂါဟာ အသက်အန္တရာယ်ထိခိုက်တဲ့အထိ ဆိုးနိုင်တယ်လို့ သိခဲ့ရပါတယ်။ ဒါပေမဲ့ ဝေးလံတဲ့ နယ်ဘက်ဆီ ဒီသတင်းက ရောက်ခဲ့ပုံ မရပါဘူး။ ဖေဖော်ဝါရီ ၇ ရက်နေ့မှာ ရှမ်းနဲ့ ကရင်ဘက် အလားတူ ကလေးလူနာတွေ တွေ့ခဲ့ရပါတယ်။

ဒီတစ်ခါမှာတော့ ကရင်ပြည်နယ်က အသက် ၂ နှစ်ကလေးလေး အသက်ပါဆုံးခဲ့ရပါတယ်။ သူတို့ပြောပုံအရ ဒီတစ်ခါ ကိုရီးယားမဟုတ်ဘဲ ယိုးဒယားဝက်အူချောင်းလို့ သိရပါတယ်။ ရောဂါဖြစ်စဥ်ကတော့ အပေါ်မှာ ဖြစ်ခဲ့သလို ကြာရှည်ခံအောင် ထည့်တဲ့ နိုက်ထရိတ်ရဲ့ လက်ချက်ပဲ ဖြစ်ပါတယ်။

ဒီသတင်းကြားပြီး မကြာခင်မှာပဲ မြန်မာနိုင်ငံ အစားအသောက်နှင့် ဆေးဝါးကွပ်ကဲရေး ဦးစီးဌာနက အဲဒီလို နယ်စပ်က တရားမဝင် ရောက်လာတဲ့ အသားချောင်းတွေ မစားဖို့ တားမြစ်ချက် ထုတ်ပြန်လိုက်ပါတယ်။

ကလေးငယ်လေးတွေရဲ့ ခန္ဓာကိုယ်ဟာ သိပ်နုနယ်တာမို့ အသင့်စားအစားအစာတွေ မကျွေးသင့်ပါဘူး။ အထူးသဖြင့် အစားအစာ အဆန်းတွေ၊ အသားချောင်းတွေ ခုတလော ရှောင်ဖို့ တင်ဆက်ပေးလိုက်ပါတယ်။

Ref : Dr. AK Thein facebook, Food and Drug Association Myanmar