အာဖဂန်နစ္စတန်နိုင်ငံ မြောက်ပိုင်းက ကွန်ဒက်ဇ် ပြည်နယ်က ရှီယိုက်ဗလီတစ်ခုမှာ အောက်တိုဘာ(၈) ရက်နေ့ နေ့လည် (၂)နာရီခန့်လောက်မှာ အသေခံဗုံးခွဲတိုက်ခိုက်မှု ဆိုးဆိုးရွားရွား ဖြစ်ပွားခဲ့ပါတယ်။ ယင်းပေါက်ကွဲမှုကြောင့် ဝတ်ပြုနေသူ စုစုပေါင်း (၄၃) ဦး သေဆုံးခဲ့ပြီး (၁၄၃) ဦး ဒဏ်ရာရရှိခဲ့တယ်လို့ တာလီဘန်တွေက ဆိုထားကြောင်း နိုင်ငံတကာသတင်းများက ဖော်ပြထားပါတယ်။
ရှီယိုက် လူနည်းစု အစ္စလာမ်ဘာသာဝင်တွေဟာ အဲ့ဒီနေ့က ဗလီမှာဝတ်ပြုဆုတောင်းဖို့ လူပေါင်းများစွာ လာရောက်စုဝေးနေခဲ့ကြတဲ့ အချိန်ဖြစ်ခဲ့တယ်လို့ သိရပါတယ်။ ဒီအသေခံ ဗုံးဖောက်ခွဲမှုဟာ ဗလီမှာ ဝတ်ပြုဆုတောင်းသူတွေကို သေကြေပျက်စီးစေဖို့နဲ့ ထိခိုက်ဒဏ်ရာရရှိစေဖို့ ရည်ရွယ်ချက်ထားပြီး လုပ်ဆောင်တာဖြစ်တယ်လို့ တာလီဘန်အကြီးအကဲ ဇဘူဟူလာ မူဂျာဟစ်က ဆိုပါတယ်။
ဗလီအတွင်း ဗုံးဖောက်ခွဲမှုကိုတော့ မည်သည့်အဖွဲ့က လုပ်ဆောင်ခဲ့ကြောင်း တာလီဘန်အာဏာပိုင်တွေက လက်ရှိ စုံစမ်းနေတုန်းပဲဖြစ်ပါတယ်။ ပျံ့နှံ့လာခဲ့တဲ့ ရုပ်သံဖိုင်တွေထဲမှာတော့ ဗလီမှာပေါက်ကွဲမှုဖြစ်ပွားချိန် သက်ဆိုင်သူ ဆွေမျိုးသားချင်းတွေရဲ့ ငိုယိုသံတွေကြားနေရသလို ပြင်းထန်တဲ့ ပေါက်ကွဲမှုဒဏ်ကြောင့် ဗလီအတွင်း သေဆုံးနေသူတွေရဲ့ ရုပ်အလောင်းတွေကို သွေးသံတရဲရဲတွေကြားမှာ တစ်စစီလိုက်လံ ကောက်ယူနေတာ တွေ့ရပါတယ်။
သတင်း အရင်းအမြစ်៖ Source - ANews