မြန်မာနိုင်ငံအတွင်းဖြစ်ပွားနေတဲ့ စစ်ရေးပဋိပက္ခတွေကြောင့် အိန္ဒိယနိုင်ငံ၊ မီဇိုရမ်ပြည်နယ်အတွင်း ထွက်ပြေးတိမ်းရှောင်လာသော စစ်ဘေးရှောင်ပြည်သူတွေနဲ့ မြန်မာနိုင်ငံရှိ ဇိုး (ချင်း) လူမျိုးများအကြား ကိုဗစ်-၁၉ ဒဏ်သင့် ပြည်သူတွေကို ကူညီထောက်ပံ့နိုင်ရေးအတွက် ရန်ပုံငွေရှာတဲ့အနေနဲ့ Zofate Gospel Charity for Myanmar ၊ North America - International Focused ခေါင်းစဉ်ဖြင့် မြောက်အမေရိက နဲ့ နိုင်ငံတကာကို ရန်ပုံငွေကောက်ရန်ရည်ရွယ်ပြီး ကျင်းပခဲ့ကြပါတယ်။
မြန်မာပြည်သူများအတွက် ရည်ရွယ်ပြီး စေတနာ ဓမ္မဂီတာ ရန်ပုံငွေ ဖျော်ဖြေပွဲကို ကျင်းပရာ ရူပီး ၉ သိန်း (မြန်မာငွေ သိန်း၂၃၀ ကျော်) ရရှိထားကြောင်း Glory Mizo Channel မှသိရပါတယ်။
အဆိုပါပွဲကို ဦးဆောင်ကျင်းပသူ Glory Mizo Channel ပိုင်ရှင် Breakthrough Believer Ministries ခေါင်းဆောင် Dr. Dennis Ramdinmawia က“ပြီးခဲ့တဲ့ ရက်ပိုင်းအနည်းငယ်က စစ်ကောင်စီတပ်ဖွဲ့က ထန်တလန်မြို့ကို အကြီးအကျယ်တိုက်ခိုက်ခဲ့တယ်။ ပါစတာတစ်ဦးလည်း အသတ်ခံရတဲ့အပြင် လက်စွပ်ကိုလည်း ချွတ်ယူခဲ့ကြတယ်။ ဟားခါးမှာလည်း တိုက်ပွဲတွေကြုံနေကြရတယ်။ ယခုလို တိုက်ပွဲတွေ နေရာအနှံ့အပြားမှာ ဖြစ်နေတဲ့အချိန်မှာဘဲ ကိုဗစ်-၁၉ ရောဂါကလည်း တိုးလာတယ်။
ဇိုး (ချင်း) မျိုးနွယ်စု အများအပြားရှိနေတဲ့ တာဟန်းဒေသမှာဆိုရင်လည်း အောက်စီဂျင်မလုံလောက်မှုတွေ၊ စားနပ်ရိက္ခာပြတ်လတ်မှုတွေ တွေ့ကြုံနေရပါတယ်။ ဒီအရာတွေကို ကျနော်တို့ ကူညီဆောင်ရွက်ခြင်းဟာ ကျနော်တို့ တာဝန်ဖြစ်တယ်”လို့ ရန်ပုံငွေရှာဖွေ ပွဲပြုလုပ်ရခြင်း အကြောင်းရင်းကို ယခုလိုပြောဆိုသွားပါတယ်။
ရန်ပုံငွေ ဖျော်ဖြေပွဲကို မီဇိုရမ်ပြည်နယ်ရှိ နာမည်ကျော် ဓမ္မသီချင်းအဆိုတော်များနဲ့ နိုင်ငံတကာရောက် ချင်းအဆိုရှင်များမှ မီဇိုး၊ ဟာခါး၊ ဖလမ်း၊ တီးတိန် ဘာသာစကားများဖြင့် သီချင်းများသီဆိုပြီး ပါဝင်အားဖြည့်သီဆိုခဲ့ကြပါတယ်။
Zofate Gospel Charity for Myanmar part–1 ရံပုံငွေရှာဖွေပွဲကို ပြီးခဲ့တဲ့စက်တင်ဘာ ၁၅ ရက်နေ့ညက မီဇိုရမ်တွင် ကျင်းပပြုလုပ်ခဲ့ပြီး စက်တင်ဘာ ၃၀ ရက်နေ့အထိ ရရှိသော ငွေပမာဏမှာ ရူပီး ၄၅ သိန်းကျော်ရှိခဲ့ပါတယ်။
Zofate Gospel Charity for Myanmar part–2 ရံပုံငွေရှာဖွေပွဲကို အောက်တိုဘာ ၄ ရက်နေ့ မနက်ပိုင်းအထိ ရရှိထားတဲ့ ပမဏမှာ ရူပီး ၉ သိန်းခန့်ရှိနေပြီဖြစ်ကြောင်းနဲ့ အောက်တိုဘ ၁၀ ရက်နေ့အထိ Donation ပေးလှူထည့်သွင်းလို့ရကြောင်းလည်း သိရပါတယ်။
ယခုပွဲမှ ကောက်ခံရရှိမည့် ရန်ပုံငွေများကို ချင်းခေါင်းဆောင်များနှင့် တိုင်ပင်ဆွေးနွေးပြီး လိုအပ်သည့် နေရာများတွင် အသုံးပြုသွားမည်ဖြစ်ကြောင်း ပွဲစီစဉ်သူများထံမှ သိရပါတယ်။
Source: Glory Mizo Channel