ထိုင်းနိုင်ငံ ၊ မဲဆောက်မြို့ ထာ့ဆိုင်လွတ်ရပ်ကွက်၊ မြို့ပတ်လမ်းသစ် ၊ဖတ်ထရဝိထယားကျောင်းရှေ့မှာ လူကူးခုံးကျော်တံတားတစ်ခု မြေသယ်ယာဥ်ပေါ်သို့ပြိုကျမှု ဖြစ်ပွားခဲ့ကြောင်း နိုင်ငံသတင်းများက ဖော်ပြလာခဲ့ပါတယ်။ ယင်းဖြစ်စဥ်မှာ စက်တင်ဘာ (၃၀) ရက်၊ မနက် (၁၁)နာရီကျော်လောက်မှာဖြစ်သွားခဲ့ပြီး ခုံးကျော်ကွန်ကရစ်တံတားပြိုကျမှုကြောင့် အောက်မှာရှိတဲ့ မြေသယ်ယာဥ်(၁)စီး ပိမိကာ ယာဥ်ပေါ်လိုက်ပါလာသူ (၂)ယောက်ကတော့ နေရာမှာပဲ သေဆုံးသွားခဲ့ပါတယ်။
ဖြစ်စဥ်နဲ့ပတ်သက်ပြီး တိုင်ကြားချက်အရ ချက်ချင်း သွားရောက်ကြည့်ရှုခဲ့တယ်လို့ မဲဆောက်ရဲစခန်းတာဝန်ရှိသူက ပြောပါတယ်။"ကားခေါင်းထဲမှာတော့ သေဆုံးနေတဲ့ ယာဉ်မောင်းသမားနဲ့ ဘေးကထိုင်လိုက်လာတဲ့ အလုပ်သမား (၁) ဦးတို့ကို တွေ့ရပြီး အမည်ကိုတော့ စုံစမ်းဆဲပဲလို့" ရဲတပ်ဖွဲ့ကဆိုထားပါတယ်။ ခုံးကျော်တံတား ပြိုကျရတဲ့အကြောင်းရင်းနဲ့ ပတ်သက်ပြီး ရဲတပ်ဖွဲ့က ဆက်လက်စုံစမ်းနေဆဲလို့လည်း ဖော်ပြထားပါတယ်။
မျက်မြင်ကိုယ်တွေ့များရဲ့ ပြောဆိုချက်တွေအရ အဆိုပါ ကားသမားတွေက ထိုင်းလူမျိုးတွေဖြစ်ပြီး မြေသယ်လာရာမှ မြေချပြီး ကားနောက်ဘော်ဒီကို ပြန်ချဖို့ မေ့ခဲ့တာကြောင့် ခုံးကျော်တံတားအား အရှိန်ပြင်းပြင်းနဲ့ ဝင်တိုက်ခဲ့တာဟု ပြောဆိုထားကြပါတယ်။ အဆိုပါ တံတားဟာ ညနေညခင်းတွေမှာ အများပြည်သူများက အလှဓာတ်ပုံများ တတ်ရောက် ရိုက်ကူးနေတတ်တဲ့ တံတားတစ်ခုဖြစ်ကြောင်း သိရပါတယ်။
သတင်း အရင်းအမြစ်៖ Source - One 32