ကိုဗစ်တတိယလှိုင်းစတင်ဖြစ်ပွားခဲ့ပြီး သေဆုံးသူတွေများပြားခဲ့စဥ်က ပရဟိတသမားတွေကလည်း နေ့ညမနားဘဲ မမောနိုင်မပန်းနိုင်နဲ့ ပြည်သူတွေကို ကူညီပေးခဲ့ကြပါတယ်။ ပြည်သူတွေဒုက္ခရောက်နေတာမို့ လူငယ်တွေဟာလည်း ပရဟိတအလုပ်တွေကို ဝင်ရောက်လုပ်ကိုင်ပြီး တတ်နိုင်သလောက် ကူညီပေးခဲ့ကြပါတယ်။ အသက်(၁၀)နှစ်အရွယ်သာ ရှိသေးတဲ့ ပရဟိတကလေးငယ်လေးတစ်ယောက်ဟာလည်း ကမ်းလင့်လက်များ လူမှုကူညီရေးအသင်းနဲ့အတူ ပရဟိတအလုပ်တွေကို သူတတ်နိုင်သလောက် လုပ်ကိုင်နေပါတယ်။

မောင်ပြည့်စုံထွန်းလို့ အမည်ရတဲ့ အဆိုပါအသက်(၁၀)နှစ်အရွယ် ကလေးငယ်လေးဟာ ကျောက်မဲမြို့က ကိုဗစ်လူနာတွေကို သူတတ်နိုင်သလောက်ကူညီပေးခဲ့သလို PPEဝတ်စုံဝတ်ဆင်၍ ပိုးသတ်ဆေးဖြန်းတာတွေ ပြုလုပ်ပေးခဲ့သူဖြစ်ပါတယ်။ မောင်ပြည့်စုံထွန်းကတော့ ( ၂)လကျော်တဲ့အထိ မိဘအိမ်ကိုလုံးဝမပြန်ဘဲ ပရဟိတအလုပ်တွေကို ပျော်ရွှင်တက်ကြွစွာ လုပ်ကိုင်နေခဲ့တာဖြစ်ပါတယ်။ ယခုမှာတော့ မောင်ပြည့်စုံထွန်းတစ်ယောက် စစ်ဘေးရှောင်ပြည်သူတွေဆီ သွားရောက်လှူဒါန်းမှုတွေ ပြုလုပ်မှာဖြစ်လို့ အရမ်းပျော်ရွှင်နေခဲ့ပါတယ်။

ကမ်းလင့်လက်များလူမှုကူညီရေးအသင်းက ပရဟိတသမားတစ်ဦးကတော့ အသင်း က အသက်အငယ်ဆုံးဖြစ်တဲ့ မောင်ပြည့်စုံထွန်းတစ်ယောက် စစ်ဘေးရှောင်တွေကို သွားလှူမယ်ဆိုတော့ အရမ်းတက်ကြွနေကြောင်း၊ Covid တတိယလှိုင်းစ ကတည်းက ယနေ့ထိ (၂)လကျော်ပြီဖြစ်ပေမယ့် အိမ်မပြန်ဘဲ ပြည်သူတွေကို ကူညီပေးနေကြောင်း၊ မောင်ပြည့်စုံထွန်းတစ်ယောက် မိဘနဲ့ဝေးနေပေမဲ့ သူ့ရင်ထဲက ပရဟိတစိတ်ကြောင့် အမြဲပျော်ရွှင်တက်ကြွလန်းဆန်းနေကြောင်း ပြောပြလာခဲ့ပါတယ်။ ပရဟိတအလုပ်တွေကို ပျော်ပျော်ရွှင်ရွှင်နဲ့ လုပ်ကိုင်နေတဲ့ နောင်ပိန်မြို့က မောင်ပြည့်စုံထွန်းရဲ့ ပုံရိပ်လေးတွေကို ပြန်လည်ဖော်ပြပေးလိုက်ရပါတယ်။

Source : Original Uploder