မိဘရဲ့အရိပ်ဟာ အအေးချမ်းဆုံးနဲ့အလုံခြုံဆုံးဆိုတာကို ဒုက္ခတွေရောက်မှသိကြသလိုမျိုး တော်လှန်ရေး ကာလမှာ ပြည်သူ့အောင်ပွဲအတွက် အပြင်းအထန်ကြိုးစားပေးနေတဲ့ PDF လူငယ်လေးတွေဟာ မိဘအရိပ်မှာတော့ မစားချင်တာ မလုပ်ချင်တာ မသွားချင်တာတွေ ရှိခဲ့ပေမယ့် တောထဲတောင်ထဲ ရောက်လာတဲ့အချိန်မှာတော့ မစားချင်လဲစားရ မသွားချင်လဲသွားရ မလုပ်ချင်လဲလုပ်ရတဲ့ အနေအထားတွေမှာ တဖြည်းဖြည်းနေသားကျလာပြီး တော်လှန်ချင်စိတ်တွေ ပိုပြီးပြင်းပြလာခဲ့ပါတယ်။

ဒီတော်လှန်ရေးကြီးအောင်မြင်မှသာ အရင်လိုအေးချမ်းတဲ့ဘဝတွေကို ပိုင်ဆိုင်နိုင်တော့မှာမို့ ပြည်သူတစ်ရပ်လုံးကလည်း ဒီတော်လှန်ရေးအတွက် အပြည့်အဝထောက်ပံ့ပေးဖို့ အဆင်သင့်ပါပဲ။ မိဝေးဘဝေးနဲ့ မအေးချမ်းရတဲ့နေ့ရက်တွေမှာ အိမ်ကိုလွမ်းရင်လည်း ခံစားချက်တွေမြိုသိပ်ပြီး နေခဲ့ရပါတယ်။ အရသာရှိတာလေးတွေကိုစားချင်ပေမယ့် အခြေအနေမပေးတဲ့အချိန်မှာ ရှိတာလေးနဲ့ အာဟာရဖြစ်အောင် ကြိတ်မှိတ်မြိုချရတာတွေလည်းရှိခဲ့ပါတယ်။

ပြည်သူ့အောင်ပွဲအတွက် ဘဝတွေ အနာဂတ်တွေ အချိန်တွေ သွေးတွေ ချွေးတွေ အားလုံးရင်းနှီးပေးဆပ် နေကြတဲ့ PDF လူငယ်တွေဟာ အကြိမ်ကြိမ်ဦးညွှတ်ထိုက်သူတွေပါ။ အသက်နဲ့ပါရင်းပြီး တိုက်ပွဲဝင်နေကြသူတွေဖြစ်တာကြောင့် ပြည်သူတွေကလည်း သူတို့ကို အများကြီးထောက်ပံ့ပေး သင့်ပါတယ်။ ထင်ထားတာထက် ပိုပြီးခက်ခဲတဲ့အခြေအနေတွေကို ရင်ဆိုင်နေရသူတွေမို့ ပြည်သူတွေရဲ့ထောက်ပံ့ပေးမှု အပြည့်အဝလိုအပ်ပါတယ်။

သတင်း အရင်းအမြစ်៖ Byat Sote's FB Acc