ဆက်ဆံရေးတွေမှာတစ်ယောက်ကိုတစ်ယောက် သဝန်တိုခြင်းဆိုတာရှိလေ့ရှိတတ်ပါတယ်။ ဒါပေမဲ့ ဘာလို့သဝန်တိုရတယ်ဆိုတဲ့အကြောင်းရင်းကိုတော့ တိတိကျကျမသိထားကြပါဘူး။ အမှန်တော့သဝန်တိုခြင်းဆိုတာအကြောင်းမဲ့ပေါ်ပေါက်လာတာမဟုတ်ပါဘူး။ ကိုယ်တိုင် ဒါမှမဟုတ် တစ်ဖက်ပါတနာရဲ့ အပြုအမူနှင့်ခံစားချက်တွေကြောင့်ဖြစ်လာရခြင်းဖြစ်ပါတယ်။

စိတ်မလုံခြုံမှုဟာ သဝန်တိုခြင်းဖြစ်ပေါ်လာရတဲ့အကြောင်းရင်းတွေထဲမှာ အဓိကဖြစ်ပါတယ်။ ကိုယ့်ကိုယ်ကိုယ်ယုံကြည်မှုအားနည်းပြီးမလုံမခြုံခံစားနေရသူတွေဟာ ဒီခံစားချက်ကြောင့်ပဲ တစ်ဖက်လူကိုပိုပြီးသဝန်တိုတတ်ကြပါတယ်။ ဒီလိုခံစားချက်ဟာ သိမ်ငယ်စိတ်ဝင်တာနှင့်လည်းဆင်တူပါတယ်။ ကိုယ့်ရဲ့သိမ်ငယ်စိတ်ကြောင့် တစ်ဖက်လူကိုပိုပြီး သဝန်တိုနေတာဖြစ်ပါတယ်။

နောက်တစ်ချက်ကတော့ အလွန်အကြူးတွေးလွန်းမှုကြောင့်ဖြစ်ပါတယ်။ အတွေးလွန်ပြီး မဖြစ်သေးတာတွေကို ကြိုတင်စဥ်းစားပြီး စိတ်ပူတာကြောင့်ဒီလိုသဝန်တိုမှုတွေဖြစ်လာရခြင်းဖြစ်ပါတယ်။ ပြီးတော့ ပိုင်ဆိုင်လိုစိတ်ပြင်းထန်လွန်းခြင်းကလည်း သဝန်တိုမှုတွေဖြစ်ရခြင်းရဲ့အဓိကကျတဲ့အကြောင်းရင်းတွေထဲကတစ်ခုပဲဖြစ်ပါတယ်။

ဒါ့အပြင် ပင်ကိုယ်အကျင့်စရိုက်ကလည်းအကြောင်းရင်းတစ်ခုဖြစ်နိုင်ပါတယ်။ ဥပမာ အကြောက်လွန်တတ်တဲ့ကိုယ်ရည်ကိုယ်သွေးရှိသူတွေဟာ သူတို့ထားခံရမှာနှင့်လမ်းခွဲရမှာကိုကြောက်ပြီးလိုတာထက်ပိုတဲ့ သဝန်တိုမှုတွေလုပ်တတ်ကြတာဖြစ်ပါတယ်။ ချစ်လို့ဆိုတာထက် သူတို့ရဲ့စိတ်ကျေနပ်မှုရှိစေဖို့တစ်ဖက်လူကိုထိန်းချုပ်ထားချင်တဲ့သဘောမျိုးပဲ ဖြစ်ပါတယ်။