ဒရာမာကားတွေကြည့်ခြင်းက အချိန်ကုန်ပြီး မျက်စိညောင်းစေရုံပဲမဟုတ်ဘဲ အကျိုးကျေးဇူးရတာတွေလည်းရှိပါတယ်။ ပထမဆုံးအနေနှင့် ဒရာမာကြည့်လေ့ရှိသူတွေဟာ ကိုယ်တိုင်နှင့်ပတ်ဝန်းကျင်အကြောင်းကိုပိုသိတတ်ကြပါတယ်။ ဒရာမာအများစုဟာ လက်တွေ့ဘဝကအဖြစ်အပျက်တွေကိုပဲ ရိုက်ကူးထားတာဖြစ်တာကြောင့် လူတွေအကြောင်းကိုပိုပြီးသိလာစေဖို့ကူညီပေးပါတယ်။

ဒါ့အပြင် ဒရာမာကြည့်သူတွေဟာ စိတ်ကူးစိတ်သန်းကောင်းမွန်လေ့ရှိကြပါတယ်။ မတူညီတဲ့အရာတွေကို ဇာတ်လမ်းတွေကနေတစ်ဆင့်မြင်တွေ့ဖူးတာကြောင့် တစ်ခြားသူတွေထက်ပိုပြီးတွေးခေါ်နိုင်ကြပါတယ်။ စိတ်ဖိစီးမှုနှင့် စိတ်ပိုင်းဆိုင်ရာရောဂါတွေကို ဒရာမာကြည့်လေ့ရှိသူတွေဆီမှာမတွေ့ရတတ်ပါဘူး။ လက်တွေ့ဘဝရဲ့ဖိစီးမှုဝွေကို ဇာတ်လမ်းတွေကြည့်ခြင်းအားဖြင့် ဖြေဖျောက်လေ့ရှိတာကြောင့် ဖြစ်ပါတယ်။

ဇာတ်လမ်းထဲကဇာတ်ကောင်နှင့်တစ်ခြားသူတွေကို နားလည်နိုင်ဖို့ကြိုးစားရတာကြောင့် ကြောင်းကျိုးဆက်စပ်တွေးခေါ်ပုံနှင့် ကိုယ်ချင်းစာစိတ်တွေတိုးများလာစေနိုင်ပါတယ်။ တစ်ခြားသူတွေဖက်ကိုပိုပြီးနားလည်ပေးတတ်လာတာကြောင့် အချင်းချင်းဆက်ဆံရေးတွေမှာပိုပြီးကောင်းမွန်တဲ့ လုပ်ဆောင်မှုတွေကိုဖြစ်လာစေနိုင်ပါတယ်။

လေ့လာချက်တွေအရ ဒရာမာတွေကြည့်တာဟာတစ်နည်းအားဖြင့် ဦးနှောက်နှင့် စိတ်ကိုအနားပေးတာဖြစ်ပေမဲ့ ပိုပြီးလှုပ်ရှားလာအောင်လှုံ့ဆော်ပေးတဲ့အရာလည်းဖြစ်တယ်လို့သိရပါတယ်။ မှတ်ဉာဏ်ကိုအသုံးပြုပြီး ဇာတ်လမ်းကိုလိုက်ပါစီးမျောရတာကြောင့် မှတ်ဉာဏ်ကိုလေ့ကျင့်ပေးသလိုဖြစ်နေမှာဖြစ်ပါတယ်။ ဒါ့အပြင် စိတ်ခံစားချက်အတက်အကျတွေကို ဒရာမကနေတစ်ဆင့်ရရှိနိုင်တာကြောင့် စိတ်ခံစားချက်ပိုင်းကိုလည်းအထောက်အကူဖြစ်စေမှာဖြစ်ပါတယ်။