ယောကျ်ားလေးနှင့် မိန်းကလေးတွေရဲ့အချစ်ရေး ကိုင်တွယ်ပုံကွာခြားချက်များ

မိန်းကလေးနှင့်ယောကျာ်းလေးအများစုဟာ ဆက်ဆံရေးတစ်ခုထဲမှာအတူတူပေါင်းစည်းတဲ့အခါ ဒီဆက်ဆံရေးကိုကိုင်တွယ်တဲ့ပုံတွေ အများကြီးကွာခြားလေ့ရှိပါတယ်။ အကြောင်းကတော့ ခံယူချက်နှင့်စိတ်နေသဘောထားမတူတာကြောင့်ဖြစ်ပါတယ်။ အဓိကအနေနှင့် ဘာတွေကွာခြားလေ့ရှိလဲဆိုတာကိုဖော်ပြပေးသွားပါမယ်။

ယောကျာ်းလေးတွေဟာ မိန်းကလေးတွေထက် ပိုလွယ်လွယ်ကူကူချစ်သွားတတ်ကြပါတယ်။ ဆန့်ကျင်ဖက်အနေနှင့်တော့ မိန်းကလေးတွေကို တစ်ယောက်ယောက်ကိုအလွယ်တကူချစ်သွားတယ်ဆိုတာမရှိဘဲ အချိန်ပေးစောင့်ကြည့်ပြီးမှ ချစ်ကျွမ်းဝင်ကြလေ့ရှိပါတယ်။ ချစ်ခွင့်ပန်ပြီး ချစ်တယ်လို့ယောကျာ်းလေးအများစုကပဲ စတင်ပြောလေ့ရှိပေမဲ့ ချစ်သူဖြစ်ပြီးနောက်ပိုင်းမှာတော့ မိန်းကလေးတွေကပဲ ဆက်ပြီးတော့ချစ်တယ်လို့ပြောကြလေ့ရှိတာဖြစ်ပါတယ်။

ပြီးတော့ မိန်းကလေးတွေအတွက် ယောကျ်ားလေးတစ်ယောက်ကိုချစ်မိဖို့ဆို ရုပ်ရည်ကအရေးကြီးတဲ့နေရာမှာမပါဝင်ပါဘူး။ လေ့လာထားချက်တွေအရ မိန်းကလေးတွေအတွက် ရုပ်ရည်ကသိပ်အရေးမကြီးဘဲ စိတ်နေစိတ်ထားနှင့်အပြုအမူတွေကပဲ ပိုအရေးကြီးတတ်တယ်လို့သိရပါတယ်။ ဒါပေမဲ့ ယောကျ်ားလေးအများစုကတော့ ရုပ်ရည်ကိုအခြေခံပြီးပဲ အချစ်ရေးကိုရွေးချယ်တတ်ကြပါတယ်။

ထူးဆန်းတဲ့အချက်တစ်ခုကတော့ ဆက်ဆံရေးကြောင့်ဖြစ်ရတဲ့ပြဿနာတွေကိုရင်ဆိုင်ဖြေရှင်းရတဲ့နေရာမှာတော့ မိန်းကလေးတွေဟာ ယောကျ်ားလေးတွေထက် အများကြီးခံနိုင်ရည်ရှိတတ်ကြပါတယ်။ သူတို့အနေနှင့် ဒီလိုဆက်ဆံရေးပြဿနာတွေကြောင့်လွယ်လွယ်ကူကူမပြိုလဲတတ်ကြပါဘူး။ ယောကျာ်းလေးတွေကတော့ ဒီလိုပြဿနာတွေကို ခံနိုင်ရည်အားနည်းလေ့ရှိကြပါတယ်။