အဝတ်အထည်အဟောင်းတွေကို စက်ရုံတွေအများစုမှာ လူသားတွေပြန်လည်အသုံးပြုလို့ရနိုင်တဲ့ ပစ္စည်းအသစ်တွေအဖြစ် ပြန်လည်အသုံးချကြတာရှိပါတယ်။ အဝတ်အထည်ဟောင်းတွေကို ထပ်ဆင့် တစ်ပတ်ရစ်ဈေးကွက်မှာတင်ရောင်းတာလည်းလုပ်လေ့ရှိပါတယ်။ တစ်ကယ်လို့ အဝတ်တွေဟာဝတ်လို့မရတော့တဲ့အထိစုတ်နေပြီဆိုရင် စက်ရုံတွေမှာ ပုံစံနှင့်အရွယ်အစား အရောင်တွေကိုလိုက်ပြီး Recycling လုပ်ကြပါတယ်။
ပထမဆုံးအဝတ်တွေမှာပါတဲ့ အထည်မဟုတ်တဲ့ပစ္စည်းတွေ ကြယ်သီး၊ ခါးပတ်၊ သားရေနှင့်အလှဆင်ကျောက်လိုမျိူးကိုအကုန်ဖြုတ်ရပါတယ်။ အထည်သီးသန့်ဖြစ်သွားတဲ့အခါ သဘာဝအထည်နှင့် ဓာတုဗေဒပါတဲ့အထည်ဆိုပြီးနှစ်မျိူးခွဲလိုက်ပါတယ်။ အဲ့ဒီ့အုပ်စုမှာမှ အရောင်ကိုလိုက်ပြီးထပ်ခွဲထုတ်တာရှိပါသေးတယ်။ အရောင်ကိုခွဲခြားတဲ့နေရာမှာလည်း ပြန်လည်ဆေးဆိုးဖို့လိုတဲ့အထည်နှင့်မလိုတဲ့အထည်ဆိုပြီးထပ်ခွဲတာဖြစ်ပါတယ်။
သဘာဝအထည်တွေကိုဆိုရင် စက်တွေနှင့်အပိုင်းပိုင်းဖြတ်တာ ဒါမှမဟုတ်အမှုန့်ဖြစ်အောင်ကြိတ်ပြီး ပြန်လည်အသုံးပြုနိုင်တဲ့ချည်တွေအဖြစ်ထုတ်လုပ်ပါတယ်။ ဒါပေမဲ့အဝတ်အထည်တိုင်းကတော့ ချည်အဖြစ်ပြုလုပ်တာမဟုတ်ပါဘူး။ တစ်ချိူ့အဝတ်အထည်တွေကိုတော့ အစိတ်စိတ်အပိုင်းပိုင်းဖြစ်အောင်လုပ်ပြီး မွေ့ရာ ကားထိုင်ခုံလိုမျိူးထဲမှာဖြည့်ရတဲ့အရာတွေအဖြစ်အသုံးပြုပါတယ်။
ဓာတုပစ္စည်းတွေပါတဲ့ အထည်တွေကိုတော့ အရင်ဆုံးအပိုင်းပိုင်းဖြတ်ပြီး အလုံးလေးတွေလုံးလိုက်ပါတယ်။ ပြီးသွားရင် အဲ့ဒီ့အလုံးတွေကိုအရည်ဖျော်ပြီးအထည်အသစ်တွေပြုလုပ်နိုင်တဲ့ကုန်ကြမ်းတွေအဖြစ်ကိုပြောင်းလဲလိုက်တာဖြစ်ပါတယ်။ ဒီလိုအဝတ်အထည်တွေကို ပြန်လည်အသုံးပြုလို့ရခြင်းက ကမ္ဘာမြေကြီးရဲ့ကျန်းမာရေးကိုအများကြီးကောင်းမွန်စေပါတယ်။
အဝတ်တွေကိုသဘာဝထဲဒီအတိုင်းစွန့်ပစ်လိုက်ရင် ဆွေးမြေ့ပျက်စီးသွားဖို့ နှစ်ပေါင်းရာနှင့်ချီကြာတတ်တဲ့အပြင် လူသားတွေအတွက်အန္တရာယ်ရှိတဲ့ မီသိန်းနှင့် ကာဗွန်ဒိုင်အောက်ဆိုဒ်ဓာတ်ငွေ့တွေကိုလည်းထုတ်လွှင့်ကြပါတယ်။ လန်ဒန်ကအဝတ်တွေကို Recycle လုပ်တဲ့စက်ရုံမှာဆိုရင်တစ်ပတ်ကိုအထည်ပေါင်းမီလီယံနှင့်ချီပြီးဝင်တယ်လို့သိရပါတယ်။
Bong I.T