လာအိုတောင်တန်းပေါ်က တောမီးကြောင့် မြူခိုးနဲ့ မီးခိုးတွေ ပိတ်ဆိုင်းနေဆဲဖြစ်တဲ့ တာချီလိတ်မြို့

မတ်လ (၂၃)ရက်နေ့တည်းက လာအိုနယ်စပ်တောင်တန်းပေါ်မှာ တောမီးလောင်ခဲ့တာကြောင့် ထိုင်းနိုင်ငံ ၊ မယ်ဆိုင် နံ ချင်းရိုင် ခရိုင်တွေမှာ လေထုညစ်ညမ်းမှု ဟာ အဆိုးဆုံး အနေအထားကိုရောက်ရှိနေခဲ့ရပြီး အခုအခါ ဒီခရိုင်တွေနဲ့ ကပ်လျက်ရှိတဲ့ တာချီလိတ်မြို့နယ်မှာပါ မီးခိုးနဲ့ မြူခိုးတွေ ပိတ်စို့နေသေးတယ်လို့သိရပါတယ်။

မတ် (၂၃) ရက်ညနေပိုင်းတည်းက တောမီးလောင်ကျွမ်းမှုစတင်ဖြစ်ပွားခဲ့တာကြောင့် အခုလိုမျိုး လေထုညစ်ညမ်းမှု ပိုဆိုးလာတာဖြစ်ပြီး တောမီး မကူးစက်ရလေအောင် အနီးအနားက နိုင်ငံခြားခရီးသွားတွေအလည်အပတ်များတဲ့ ဖူချုင်ဖ အမျိုးသား ဥယျာဉ်ကိုလည်း အနေအထားတွေပြန်လည်တည်ငြိမ်မှ ပြန်ဖွင့်ပေးမယ်ဆိုပြီး လာအိုဒေသဆိုင်ရာအာဏာပိုင်တွေက ပိတ်ခဲ့ပါတယ်။

လက်ရှိ တာချီလိတ်မြို့နယ်မှာဆိုရင် လေထုညစ်ညမ်းမှုဒဏ်ကို အတော်လေးရင်ဆိုင်နေရပြီး မြို့ထဲမှာ မြူခိုး ၊ မီးခိုးတွေနဲ့ ပိတ်လှောင်နေတာကြောင့် ပြည်သူတွေအနေနဲ့အတော်လေးစိုးရိမ်နေကြတယ်လို့ သိရပါတယ်။ ပြည်သူများရဲ့ပြောကြားချက်အရတော့ မိုးရွာမှသာ ဒီအခိုးအငွေ့တွေဟာ အမြန်ဆုံးပျောက်ကွယ်သွားနိုင်မှာဖြစ်တယ်လို့လည်းသိရပါတယ်။