ထိုင်းနိုင်ငံရဲ့ အချောဆုံး လိင်ပြောင်းဖြစ်တဲ့ မင်းသမီး၊ မော်ဒယ်နှင့် အလှဘုရင်မ Poy Treechada Petcharat ဟာ ဖူးခက်ရှိ ချမ်းသာတဲ့ သူဌေးသားတစ်ဦးနှင့် ဗုဒ္ဓဟူးနေ့မှာ လက်ထပ်ခဲ့တယ်လို့ သိရပါတယ်။

Poy ဟာ အသက် ၁၈ နှစ် လွန်ခဲ့တဲ့ ၂၀၀၄ ခုနှစ်က Miss Tiffany နှင့် Miss International Queen ပြိုင်ပွဲများမှာ ပထမဆုကိုရရှိခဲ့ပါတယ်။ ပြိုင်ပွဲပြီးတဲ့နောက်ပိုင်း သူမဟာ ထိုင်းနိုင်ငံရဲ့ ဒေသတွင်းရှိ ဖျော်ဖြေရေးနယ်ပယ်များမှာ ဝင်ရောက်ခဲ့သလို ဂီတဗီဒီယိုများမှာလည်း မော်ဒယ် ၊ သရုပ်ဆောင်အဖြစ်လုပ်ကိုင်ခဲ့ပါတယ်။

၂၀၁၃ ခုနှစ်မှာတော့ သူမဟာ Universal Artist Management Company အတွက် Zhang Jiahui၊ Gu Tianle နှင့် Liu Qingyun တို့လိုမျိုး သရုပ်ဆောင်များနှင့်အတူ ဟောင်ကောင်ရုပ်ရှင်လောကထဲကို ဝင်ရောက်လာခဲ့တယ်။ ပြီးတော့ လိင်ပြောင်းအမျိုးသမီးဖြစ်တာနဲ့ အညီ သူမဟာ LGBTQ+ တွေကို အခိုင်အမာ ထောက်ခံအားပေးသူလည်းဖြစ်ပါတယ်။

Poy လက်ထပ်ခဲ့တဲ့ ချစ်သူ Oak Bhavagha Hongyok ရဲ့ မိဘများဟာ တရုတ်ရွှေ့ပြောင်းနေထိုင်သူများဖြစ်ပြီး တော်ဝင်မျိုးရိုး "Hong Yok" ဖြင့် အပ်နှင်းခြင်းခံရတဲ့ မိသားစုလည်းဖြစ်ပါတယ်။ ပြီးတော့ ပြည်နယ်အတွင်း သံဖြူတူးဖော်ခြင်းလုပ်ငန်းကို လုပ်ကိုင်ပြီး သက်တမ်း ၈၄ နှစ်ရှိ တရုတ်-ကိုလိုနီပိုင် ပြတိုက်တစ်ခု၊ နာမည်ကြီး စားသောက်ဆိုင်တစ်ခုကိုလည်း ပိုင်ဆိုင်ထားပါတယ်။

သတို့သမီးနှင့်သတို့သားတို့ရဲ့ အခမ်းအနားအတွက် ဘတ်ငွေသန်း ၂၀ ခန့်ကုန်ကျခံပြီး လွန်ခဲ့တဲ့ ရာစုနှစ်ခြောက်ခုက ဒေသတွင်းသို့ တရုတ်ရွှေ့ပြောင်းအခြေချသူများရဲ့ ပထမဆုံးစတင်ခဲ့တဲ့ Peranakan ရိုးရာအတိုင်း ကျင်းပခဲ့ကြတာ ဖြစ်ပါတယ်။  

Poy ဟာ ရွှေချည်၊ ရှေးဟောင်းရွှေလက်ဝတ်ရတနာများနှင့် ချည်နှောင်ထားတဲ့ ရိုးရာ “Baba” သတို့သမီးဝတ်စုံအပြင် ရနောင်းခရိုင်မှ လက်မှုပညာသမားများက ရွှေစင်ဖြင့်ပြုလုပ်ထားတဲ့ “ဟွာကွမ်း” သို့မဟုတ် ပန်းသရဖူကိုလည်း ၀တ်ဆင်ထားပါတယ်။  အဆိုပါ သရဖူကိုလုပ်ရာမှာလည်း အချိန် ၃ လခန့်ယူခဲ့ရတယ်လို့ ဆိုပါတယ်။

သတို့သမီးဝတ်ဆင်ခဲ့တဲ့ ဖိနပ်ကလည်း နာမည်ဆရာကြီး Sorapol Thirawong က ဒီဇိုင်းဆွဲပြီး သဘာဝရွှေရောင်ဖြစ်အောင် အကောင်းမွန်ဆုံး သြစတြေးလျသိုးသားရေဖြင့် ပြုလုပ်ထားတာ ဖြစ်ပါတယ်။သတို့သမီးနဲ့ သတို့သားရဲ့ မင်္ဂလာဝတ်စုံကို ပြီးအောင်လုပ်ဖို့ လနဲ့ချီကြာခဲ့ပါတယ်။Poy နဲ့ Oak တို့ဟာ တစ်ယောက်နဲ့တစ်ယောက် သိခဲ့ကြတာ အနှစ် ၂၀ ရှိပါပြီ။ Oak ဟာ သူမရဲ့ အချစ်ဆုံးသူငယ်ချင်းရဲ့ အစ်ကိုလည်းဖြစ်တယ်လို့ သိရပါတယ်။

သတင်း အရင်းအမြစ်៖ Source - TheNationThailand