သစ်ခွပန်းပုံစံ အတုခိုးနေကြတဲ့ ချစ်စရာနှံကောင်မျိုးစိတ်

Hymenopus Coronatus အင်းဆက်ကတော့ အရှေ့တောင်အာရှရဲ့ အပူပိုင်းသစ်တောတွေမှာ တွေ့ရတဲ့ မန်တီမျိုးစိတ်ဝင် တစ်မျိုးပဲ ဖြစ်ပါတယ်။ မြန်မာလို အခေါ်မှာ သရဖူဆောင်းထားတဲ့ Hymenopus လို့ခေါ်ပြီး Hymenopus မျိုးစုက ဆင်းသက်လာတာပဲ ဖြစ်ပါတယ်။ နှံကောင်မျိုးစိတ်တစ်မျိုး ဖြစ်ပြီး ထူးခြားတဲ့ အရောင်အဆင်းကြောင့် အလှဆုံးအင်းဆက်မျိုးစိတ်ထဲက တစ်မျိုးအပါအဝင်ပဲ ဖြစ်ပါတယ်။ တွယ်ကပ်ထားတဲ့ သစ်ပင် ၊ သစ်ရွက် ၊ ပန်း ၊ အဖူးတို့ရဲ့ အရောင်နဲ့ ဆင်တူရိုးမှား အတုခိုးနိုင်ကြတာကြောင့် flower mantises လို့လည်း လူသိများပါတယ်။ 

အဓိကအားဖြင့် သစ်ခွပန်းကဲ့သို့ ပန်းတွေပေါ်မှာ ပန်းပုံစံ အတုခိုး ပုန်းကွယ်နေပြီး ပန်းပွင့်ဆီကို လာကာ ဝတ်မှုန်ကူးမယ့် အင်းဆက်တွေကို ဖမ်းယူ စားကြပါတယ်။ ဒီ Hymenopus Coronatus တွေမှာ သစ်ခွပန်းရဲ့ ပွင့်ချပ်နဲ့ တူတဲ့ ခြေထောက်တို့ ရှိပြီး အများအားဖြင့် အစိမ်းနုရောင် ၊ ပန်းရောင် ၊ အဖြူရောင် မှ မီးခိုးရောင် စသဖြင့် အရောင်နုနု အမျိုးမျိုး ဒေသအလိုက် ရှိပါတယ်။ အသားစား အင်းဆက်တစ်မျိုးဖြစ်တဲ့ Hymenopus Coronatus နှံကောင်တွေဟာ ထူးခြားတဲ့ ခန္ဓာကိုယ် ဖွဲ့စည်းမှု ၊ အရောင်အဆင်းတို့ကြောင့် အင်းဆက်မွေးသူတွေကြား နာမည်ကြီးပြီး တွေ့ဖို့ မလွယ်တာကြောင့် တန်ဖိုးလည်း အလွန်ပေးရတဲ့ ရှားပါးနှံကောင်မျိုးစိတ်ပဲ ဖြစ်ပါတယ်။ 

ဒါအပြင် အရွယ်ရောက်ပြီးတဲ့ Hymenopus Coronatus အမတစ်ကောင်ဟာ ပျမ်းမျှအားဖြင့် ၆၀ မီလီမီတာ ရှိပြီး အထီးတွေဟာ ၃၀ မီလီမီတာ ဝန်းကျင်သာ ရှိ‌တာကြောင့် အထီးထက် အမက အကောင်အရွယ်အစား ပိုကြီးတဲ့ ချစ်စရာ အင်းဆက်မျိုးစိတ်လေးပဲ ဖြစ်ပါတယ်။ ၅ လ သို့မဟုတ် ၆ လဝန်းကျင်သာ ရှင်သန်နိုင်ကြတဲ့ ဒီအင်းဆက်လေးတွေဟာ လက်ရှိမှာတော့ အကောင်အရေအတွက် အတော်ကို လျော့ကျလာပါတယ်။ ရာသီဥတု ဖောက်ပြားမှု ၊ သစ်တောပြုန်းတီးမှု ၊ သစ်ပင်ပန်းမန်များ လျော့ပါး လာမှုတို့အပြင် နဂိုထဲက သီးခြားပုန်းကွယ်နေတတ်တာကြောင့် Hymenopus Coronatus တွေကို ထိန်းသိမ်းစောင့်ရှောက်ဖို့ ရှာဖွေလျက်ရှိပြီး တရားဝင် မွေးမြူခွင့်လည်း ပိတ်ထားပါသေးတယ်။