၁၉၉၃ ခုနှစ်တွင် ဂျပန်ကျွန်းစု Kuroshima ကမ်းလွန်မှာ ရှာဖွေတွေ့ရှိခဲ့တဲ့ Sea Sheep တွေဟာ Costasiellidae မျိုးစိတ်က အခွံမာ မပါတဲ့ အဏ္ဏဝါနေ မျှော့မျိုးစိတ် တစ်မျိုးပဲ ဖြစ်ပါတယ်။ အရွက်မျှော့ လို့ခေါ်ကြပြီး အစိမ်းရောင် ရှိတဲ့ ခန္ဓာကိုယ်ကြောင့် လူသိများကာ ဂျပန် ၊ ဖိလစ်ပိုင် နဲ့ အင်ဒိုနီးရှားနိုင်ငံတို့ အနီးရှိ ရေပြင်တွေမှာ ကျယ်ပြန့်စွာ တွေ့ရပါတယ်။ ဒါပေမယ့် သူတို့ရဲ့ ၅ မီလီမီတာ မှ ၁၀ မီလီမီတာကြားသာ ရှိတဲ့ ခန္ဓာကိုယ်ကြောင့် အလွန်သေးငယ်ပြီး မြင်တွေ့ဖို့ ခဲယဥ်းတဲ့ ချစ်စရာရေနေသတ္တဝါလေး တစ်မျိုးပဲ ဖြစ်ပါတယ်။ အစိမ်းရောင်အတက်အလက်တွေနဲ့ ဦးခေါင်းထိပ်က ခရမ်းရောင်ချိုလေး နှစ်ခုတို့ဟာ Sea Sheep ရဲ့ ထူးခြားတဲ့ အသွင်အပြင် လက္ခဏာ တစ်ခုပါပဲ။
ဒါ့အပြင် ခြေထောက်နဲ့ တူတဲ့ အစိမ်းရောင်အတက်အလက်တွေရဲ့ ထိပ်က ပန်းရောင် အစက်လေးတွေ ဝန်းရံထားတဲ့ Sea Sheep တွေရဲ့ အနက်ရောင် မျက်လုံးဝိုင်း နဲ့ ချို တို့ဟာ သိုးတစ်ကောင်နဲ့ ဆင်တူနေတာမို့ ပင်လယ်သိုး လို့လည်း ခေါ်ကြပါသေးတယ်။ အလေးချိန် ၁၀၀ ဂရမ်သာရှိတဲ့ ပင်လယ်သိုးတွေဟာ ရေညှိ ၊ ရေမှော်တွေဆီက နေရောင်ခြည် အာဟာရဓာတ်( ကလိုရိုဖီးလ် ) ကို စုပ်ယူပြီး အပင်တွေကဲ့သို့ အစာချက်ကြပါတယ်။ ကလိုရိုပလတ်စ် ပါရှိတဲ့ ပင်လယ်သိုးတွေဟာ နေရောင်ခြည်စွမ်းအင် အနည်းငယ်ရရှိထားခြင်းကိုက အစာချက်လုပ်နိုင်ပြီး ရက်သတ္တပတ်များစွာ ရှင်သန်နိုင်ကြပါတယ်။ ပျော့ပျောင်းတဲ့ ကိုယ်ထည်နဲ့ Sea sheep တွေကို သန္တာကျောက်တန်းးများအနီး ရေညှိများပေါများတဲ့ ကျောက်ဆောင်တွေမှာ တွေ့ရတတ်ပါတယ်။
ပျမ်းမျှဘဝသက်တမ်းမှာ ၆ လ မှ ၁ နှစ်ကြား ရှိပြီး ဇီဝဗေဒအရ ‘ Costasiella Kuroshimae ‘ လို့ ခေါ်ကာ အပင်မဟုတ်တဲ့ ကမ္ဘာပေါ်က ချစ်စရာ အကောင်းဆုံး သက်ရှိမျိုးစိတ်လေးထဲက တစ်ခုပဲ ဖြစ်ပါတယ်။ မပျော်ဝင်နိုင်တဲ့ ပလပ်စတစ်များ သမုဒ္ဒရာအတွင်း စွန့်ပစ်ခြင်း ၊ ပင်လယ်ရေအောက် မုန်တိုင်းများနဲ့ ငလျင်များကြောင့် သန္တာကျောက်တန်းများ ပျက်စီးခြင်း ၊ ရာသီဥတုများ ပြောင်းလဲလာခြင်း ၊ လူသားတို့ မဆင်မခြေ ဖမ်းဆီးခြင်း စတဲ့ အကြောင်းတရားများကြောင့် ပင်လယ်သိုး အကောင်ရေ များစွာ လျော့နည်းခဲ့ပြီး ယခုမှာတော့ စနစ်တကျ ထိန်းသိမ်းရမယ့် ထူးထူးခြားခြားရေသတ္တဝါလေးတစ်မျိုးပဲ ဖြစ်ပါတယ်။