နယူးဒေလီလေဆိပ်ကနေ အပြင်ကိုကားနဲ့သယ်ထုတ်လာရင်း လူကူးတံတားအောက်မှာ ညပ်မိသွားခဲ့တဲ့ လေယာဥ်တစ်စင်းရဲ့ ရုပ်သံဖိုင်

အိန္ဒိယနိုင်ငံမှာ အောက်တိုဘာလ (၆)ရက်နေ့က လူကူးတံတားအောက်ဘက်မှာ လေယာဥ်တစ်စင်းညပ်ခဲ့မှု ဖြစ်ပွားခဲ့တယ်လို့သိရပါတယ်။ အဆိုပါဖြစ်စဥ်ရဲ့ ရုပ်သံဖိုင်တစ်ခုဟာ လူမှုကွန်ယက်ပေါ်မှာ အချိန်အတိုတွင်း ရေပန်းစားခဲ့ပါတယ်။ နယူးဒေလီလေဆိပ်ကနေ အသုံးမပြုတော့တဲ့ လေယာဥ်အဟောင်းတစ်စင်းကို လေဆိပ်အပြင်ဘက်သို့ ကားနဲ့ သယ်ထုတ်နေရင်း လူကူးတံတားအောက်အရောက်မှာ ညပ်မိသွားတာ ဖြစ်ပါတယ်။

ရုပ်သံဖိုင်ထဲမှာတော့ အဆိုပါ လေယာဥ်ဟောင်းကြီးကို တောင်ပံတွေဖြုတ်ထားပြီး ကားနဲ့သယ်ဆောင်လာတာ ဖြစ်ပါတယ်။ လေယာဥ် သယ်ဆောင်လာတဲ့ လမ်းမကြီးပေါ်မှာလည်း ကားတွေအဆက်မပြတ်သွားတာ တွေ့မြင်ရပါတယ်။ ရုပ်သံဖိုင်ကို ဖော်ပြခဲ့တဲ့ နိုင်ငံသတင်းတွေထဲမှာတော့ ဒီလေယာဥ်ကြီးဟာ Air India လေကြောင်းလိုင်းမှာ မှတ်ပုံတင်ထားတဲ့ လေယာဥ်ဖြစ်ပေမယ့် လက်ရှိမှာ ဖျက်သိမ်းခဲ့ပြီး အခြားသူကို ရောင်းချထားကြောင်း ဖော်ပြထားပါတယ်။

ဝယ်ယူခဲ့တဲ့ ပိုင်ရှင်သစ်ကတော့ ယမန်နေ့က နယူးဒေလီလေဆိပ်ကနေ သယ်ထုတ်သွားခဲ့တာ ဖြစ်ပါတယ်။ Air India လေကြောင်းလိုင်းကတော့ ဒီဖြစ်စဥ်နဲ့ပတ်သက်ပြီး ၎င်းတို့နဲ့ မသက်ဆိုင်ကြောင်းကိုလည်း ထုတ်ပြန်ကြေညာထားခဲ့ပါတယ်။ တံတားအောက်ညပ်သွားခဲ့တဲ့ လေယာဥ်ဟောင်းကြီးကို အချိန်အတော်ကြာ ထုတ်ခဲ့ရပြီး လေယာဥ်အပေါ်ပိုင်းတချို့ကတော့ ပျက်စီးသွားခဲ့ကြောင်း သိရပါတယ်။

သတင်း အရင်းအမြစ်៖ Source - ABC