ထိုင်းနိုင်ငံမှာ ပြီးခဲ့တဲ့ ရက်ပိုင်းက မုန်တိုင်းဝင်ရောက်မှုကြောင့် ပြည်နယ်တော်တော်များများမှာ စံချိန်တင် ရေကြီးရေလျှံမှုတွေဖြစ်ပေါ်စေခဲ့ပါတယ်။ ယခုတစ်ခါ ရေကြီးမှုဟာ ၂၀၁၁ ခုနှစ်က ရေကြီးမှုထက် ကျော်လွန်ပြီး ပိုမိုဆိုးရွားခဲ့တယ်လို့ သိရပါတယ်။ ရေကြီးမှုကြောင့် အိမ်ခြေပေါင်း (၁၄၀၀၀) နီးပါးလောက် ရေဘေးသင့်ခဲ့တယ်လို့ ထိုင်းနိုင်ငံသဘာဝ ဘေးအန္တရယ်ကာကွယ်ရေးနဲ့ ကယ်ဆယ်ရေးဌာနကလည်း ထုတ်ပြန်ခဲ့ပါတယ်။
တချို့ပြည်နယ်တွေမှာတော့ တောင်ပြိုလမ်းပိတ်၊ တံတားကျိုး၊ လမ်းမကြီးရော လမ်းသွယ်တွေပါ ပိတ်ဆို့ကာ လူနေအိမ်တွေ၊ ကားနဲ့ဆိုင်ကယ်တွေ၊ စိုက်ခင်းတွေ ပျက်စီးဆုံးရှုံးမှုတွေရှိခဲ့ပါတယ်။ ဒါ့အပြင် ရေကြီးနေတဲ့ နေရာတွေမှာ ပိတ်မိနေတဲ့ ပြည်သူအများအပြားကိုလည်း အရေးပေါ်ပြောင်းရွှေ့ခဲ့ရပါတယ်။ ဒီလို ရေကြီးမှုတွေဖြစ်ပေါ်နေတဲ့ ကြားကနေ ဖွင့်ထားတဲ့ ကော်ဖီဆိုင်တစ်ဆိုင်ဟာ ထိုင်းလူမှုကွန်ယက်ပေါ်မှာ နာမည်ကြီးသွားခဲ့ပါတယ်။
ဒီဆိုင်လေးကတော့ ထိုင်းနိုင်ငံ ဘန်ကောက်မြို့ နွံ့ထဘူရီရှိ ကျောက်ဖုရားမြစ်ဘေးမှာဖွင့်ထားတဲ့ " บ้านท่าน้ำนนท์ Chaopraya antique Cafe" ကော်ဖီဆိုင်ပဲဖြစ်ပါတယ်။ နာမည်ကြီးသွားရတဲ့ အကြောင်းမှာ ကျောက်ဖုရားမြစ်ရေကြီးတာကြောင့် ဆိုင်ဟာ ရေနစ်မြုပ်နေပေမယ့်လည်း မပိတ်ဘဲ ရေလှိုင်းတွေကြားမှာ မရမက ဖွင့်ထားတာကြောင့် ထိုင်းလူမှုကွန်ယက်ပေါ်မှာ ပျံ့နှံ့သွားခဲ့တာဖြစ်ပါတယ်။ ရုပ်သံဖိုင်ထဲမှာတော့ ကော်ဖီလာသောက်ကြတဲ့ Customer များဟာ ရေလှိုင်းတွေရိုက်ခတ်လာတဲ့အချိန် သဲထိပ်ရင်ဖိုနဲ့ ထိုင်ခုံတွေပေါ်တက်နေကြတာကတော့ ကြည့်မိသူတိုင်း စိတ်လှုပ်ရှားစရာ ဖြစ်ရပါတယ်။
သတင်း အရင်းအမြစ်៖ Source - ChaoprayaAntiqueCafe