ဝါယာလျှော့ဖြစ်ရာကနေ မီးလောင်မှုဖြစ်ပြီး နေအိမ်အတွင်း ပိတ်မိနေတဲ့မိသားစုကို အသက်ဘေးက အလျင်အမြန်ကယ်ထုတ်နိုင်ခဲ့တဲ့ ဖြစ်ရပ်တစ်ခု

ယခုနှစ်အတွင်း နိုင်ငံရေးမတည်ငြိမ်တဲ့အချိန် မြို့နယ်တချို့တွေမှာ မီးလောင်မှုတွေ ဆက်တိုက်ဆိုသလို ဖြစ်ပွားလာတာ တွေ့ရပါတယ်။ ယင်းမီးလောင်မှုတွေကြောင့် ခက်ခက်ခဲခဲ ရှာဖွေစုဆောင်းထားတဲ့ ပြည်သူတွေရဲ့ အိုးအိမ်စည်းစိမ် အများအပြားဟာ ပျက်စီးဆုံးရှုံးခဲ့ရပါတယ်။ တချို့ မီးလောင်မှုတွေမှာ လူသေဆုံးခဲ့ရတဲ့အထိ ဆိုးဆိုးဝါးဝါး မီးလောင်ကျွမ်းမှု ဖြစ်ခဲ့တာ တွေ့ရပါတယ်။

ယခုမှာလည်း ရှမ်းပြည်နယ်၊ တာချီလိတ်မြို့၊ ဝမ်ကောင်းရပ်ကွက်အတွင်း၊ ဘုရင့်နောင်ပုဂ္ဂလိကဈေးအနီး ယာမြေကုန်းသို့အသွား လမ်းကြားမှာ သြဂုတ်လ(၃၁)နေ့က မီးအနည်းငယ်လောင်ကျွမ်းမှုတစ်ခု ဖြစ်ခဲ့ကြောင်း ကြားသိရပါတယ်။ အဆိုပါဖြစ်စဥ်ဟာ ည(၁၁)နာရီ ဝန်းကျင်လောက်မှာစတင်ပြီး နေအိမ်အတွင်းမှာ ဝါယာလျှော့ဖြစ်ရာကနေ မီးအနည်းငယ်လောင်ကျွမ်းခဲ့ကာ မီးခိုးအများအပြားထွက်ရှိခဲ့ပါတယ်။

အဆိုပါ ဝါယာလျှော့ဖြစ်မှုကြောင့် နေအိမ်အတွင်းမှာ ပိတ်မိနေတဲ့ ကလေးသူငယ်များအပါအဝင် မိသားစုကို အနီးပတ်ဝန်းကျင်က ပြည်သူတွေနဲ့ မြို့နယ် မီးသတ်တပ်ဖွဲ့က အသက်ဘေးကနေ ကယ်ထုတ်ပေးနိုင်ခဲ့တယ်လို့ သိရပါတယ်။ နေအိမ်ထဲကနေ မိသားစုကို အလျင်အမြန် ကယ်ထုတ်နိုင်တာကြောင့် အသက်ဘေးကနေ လွတ်မြောက်ခဲ့ရပြီး ထိခိုက်ဒဏ်ရာ တစ်စုံတစ်ရာမရရှိခဲ့ဘူးလို့ သိရပါတယ်။ အဆိုပါဖြစ်ရပ်လေးကို ပြန်လည်ဖော်ပြရင်း ပရိသတ်တွေလည်း မီးသတိထားကြဖို့ သတိပေးတိုက်တွန်းလိုက်ရပါတယ်။

သတင်း အရင်းအမြစ်៖ Source - Original Upload