ဧရာဝတီတိုင်းအတွင်းမှာရှိတဲ့ မအူပင်မြို့လေးကတော့ ရန်ကုန်မြို့ကနေ မိုင်(၅၀)နီးပါးလောက်သာသွားရတဲ့ ခရိုင်မြို့လေးတစ်မြို့ပဲ ဖြစ်ပါတယ်။ လူဦးရေ သိန်းဂဏန်းမျှသာရှိပြီး စိုက်ပျိုးမွေးမြူရေး နှင့် ကုန်သွယ်ရေးကို အဓိကထားကာ အသက်မွေးဝမ်းကြောင်းပြုလုပ်နေတဲ့ မအူပင်မြို့လေးကတော့ စစ်ကောင်စီမှ အာဏာသိမ်းပြီးတဲ့နောက်မှာလည်း ဒီမိုကရေစီပြန်လည်ရရှိဖို့အတွက် ဘက်ပေါင်းစုံက မြို့နေပြည်သူများဟာ လူထုလှုပ်ရှားမှုတွေကို တက်တက်ကြွကြွ လုပ်ဆောင်ခဲ့ပါတယ်။
လက်ရှိမှာတော့ စစ်ကောင်စီက ဖမ်းဆီးမှုတွေ နေ့စဥ် ဆိုသလိုရှိနေတာကြောင့် လူထုလှုပ်ရှားမှုတွေလုပ်ဆောင်တာ နည်းပါးလာပေမယ့် လူငယ်အများစုပါဝင်တဲ့ ပြည်သူ့ကာကွယ်ရေးတပ် PDFကိုလည်း ဖွဲ့စည်းလာနိုင်ခဲ့တာ တွေ့ရပါတယ်။ ဇွန်လ (၆)ရက်နေ့ ည(၈)နာရီဝန်းကျင်ခန့်မှာတော့ မအူပင်ဆေးရုံကြီးဝန်းအတွင်းမှာ ဗုံးပေါက်ကွဲမှုတစ်ခု ဖြစ်ပွားခဲ့ပါတယ်။ ဒီလိုပေါက်ကွဲမှုဖြစ်ပွားခဲ့ပြီးတဲ့နောက်မှာ မအူပင် PDF က ကြေညာချက်တစ်ခုကို ထုတ်ပြန်လာခဲ့ပါတယ်။
ယင်းကြေညာချက်မှာတော့ ၎င်းတို့ဟာ အများပြည်သူများသွားလာတဲ့ ဆေးရုံ၊ စျေးနှင့် စာသင်ကျောင်းများကို ပစ်မှတ်ထားတိုက်ခိုက်မည် မဟုတ်ကြောင်းပါရှိသလို ပြည်သူတွေရဲ့ အသက်အိုးအိမ်၊စည်းစိမ်ကို ကာကွယ်စောင့်ရှောက်မှာဖြစ်ကာ စစ်အာဏာရှင်ကို တော်လှန်တိုက်ခိုက်မှုတွေ ဆက်လက်ပြုလုပ်သွားမယ်ဆိုပြီး ကြေညာချက်မှာ ဖော်ပြထားပါတယ်။ မအူပင်မြို့မှာတော့ ဗုံးပေါက်ကွဲမှုဖြစ်ပွားတာဆိုရင် ယနေ့အချိန်ထိ အနည်းဆုံး (၄) ကြိမ်လောက်ရှိတယ်လို့လည်း ကြားသိရပါတယ်။
သတင်း အရင်းအမြစ်៖ Source - Original Upload
Bong I.T