ခံစားနေရတဲ့ဝေဒနာတွေကြောင့် အသက် (၁၉) နှစ်မှာပဲ လောကကြီးကနေ အပြီးပိုင်ထွက်ခွာသွားပြီဖြစ်တဲ့ အောင်ခန့်ပိုင်

ဆယ်တန်းအရွယ်ကစတင်ပြီး တီဘီဆေးတစ်နှစ်ခွဲခန့်သောက်ရသလို ခါးရိုးခွဲထားရပြီး စကူ (၈) ချောင်းစုပ်ထားရတဲ့ လှိုင်မြို့နယ် (၁၃) ရပ်ကွက်ကအောင်ခန့်ပိုင်ဟာ ဒီနေ့မနက် (၅) နာရီခန့် မှာပဲ ကွယ်လွန်သွားခဲ့ပါတယ်။ အလှူရှင်တွေရဲ့စေတနာသဒ္ဓါကြေးတွေကြောင့် ခံစားနေရတဲ့ ဝေဒနာတွေကိုကုသဖို့ အလှူငွေရခါနီးမှအခုလိုဖြစ်သွားတာ တကယ်ကိုစိတ်မကောင်းစရာပါ။ အသက်ငယ်ငယ်ရွယ်ရွယ်နဲ့ လောကကြီးအကြောင်းဘာမှမသိသေးခင် အိပ်ယာပေါ်မှာပဲ အချိန်တွေကိုကုန်ဆုံးလိုက်ရပြီး နောက်ဆုံးအသက်ပါပေးလိုက်ရတဲ့အထိဖြစ်သွားခဲ့တာပါ။ သားလေးကိုပြန်ကောင်းလာနိုးနဲ့ကုသနေရင်းကမှ ဆုံးရှုံးလိုက်ရတဲ့မိဘတွေရဲ့ ခံစားချက်ကတော့ ရင်ထဲမချိနိုင်အောင်ပါပဲ။

ခွဲထားတဲ့ခါးရိုးမှာစုပ်ထားတဲ့စကူပြုတ်ထွက်သွားတာကြောင့် နောက်ထပ်ခွဲစိတ်ရမှာဖြစ်ပြီး လက်ရှိမှာလည်း အဆုတ်မှာသွေးခဲပြီး အသက်ရှူမဝတော့ အောက်ဆီဂျင်မဖြုတ်ဘဲ အမြဲတပ်ထားရတဲ့အခြေအနေပါ။ ခံစားနေရတဲ့ဝေဒနာတွေချုပ်ငြိမ်းသွားတာလည်း အောင်ခန့်ပိုင်အတွက်တော့ ကောင်းတဲ့ဖြစ်ရပ်လို့ဆိုရမှာပါပဲ။ နေပြန်ကောင်းလာဖို့ အားလုံးစုပြီးလှူဒါန်းပေးထားတဲ့ အလှူရှင်တွေလည်း အရမ်းကိုစိတ်မကောင်းဖြစ်နေကြပါ တယ်။ ဒီဘဝဒီခန္ဓာမှာပဲ ဒီရောဂါတွေချုပ်ငြိမ်းပါစေ အောင်ခန့်ပိုင်ရေ။

အောင်ခန့်ပိုင်ဆီတစ်ခါသွားလှူဖူးပြီး နောက်ထပ်လှူဖို့လည်းစီစဉ်နေတဲ့ ဓာတ်ပုံဆရာ အောင်ရဲလင်းက စိတ်မကောင်းဖြစ်ရကြောင်းကို " ညီလေး အောင်ခန့်ပိုင် ဒီနေ့မနက် (၅) နာရီလောက်ကပဲ ဆုံးသွားပါပြီ။ ကျတော်ညီလေးအဖေနဲ့ အခုပဲဖုန်းပြောပြီးတာဗျ။ ညီလေးရေ ကောင်းရာဘုံဘဝရောက်ပါစေလို့ အကိုတို့ဆုတောင်းပေးပါတယ်နော် ညီလေး။ အလှူငွေတွေမနက်ဖြန် သွားလှူမှာလုပ်ထားတာ ကျတော် ဒီနေ့ညနေပဲ သွားလှူပေးမယ်ခင်ဗျာ။ ?? " ဆိုပြီး ပြောခဲ့ပါတယ်။ ကောင်းရာဘုံဘဝရောက်ရှိပြီး ဖြစ်လေရာဘဝတိုင်းမှာ အနာရောဂါကင်းမဲ့သူဖြစ်ပါစေ။

သတင်း အရင်းအမြစ်៖ Aung Ye Lin's FB Acc