ဆန္ဒထုတ်ဖော်မှုတွေ နေ့တိုင်းရှိနေတဲ့ မန္တလေးမြို့အတွင်းမှာဆိုရင်လည်း ယနေ့ မေလ ၉ ရက်နေ့ မနက်ပိုင်းမှာ မဟာတပ်ပေါင်းစု သပိတ်စစ်ကြောင်း ထွက်ရှိခဲ့ပါတယ်။
ဒီသပိတ်စစ်ကြောင်း အတွင်းမှာတော့ စိန်ပန်း သပိတ်စစ်ကြောင်း ၊ အဖမ်းဆီးခံပြည်သူများ ကိုယ်စားပြု သပိတ်စစ်ကြောင်း ၊ သမဝါယမ တက္ကသိုလ် ကျောင်းသား/ ကျောင်းသူများ သပိတ် နဲ့ အခြားသော ပူးပေါင်း သပိတ်စစ်ကြောင်းတွေလည်း ပါဝင်ပါတယ်။
ဒါ့အပြင် ကျောင်းသား/ ကျောင်းသူတွေနဲ့ လမ်းသွားလမ်းလာ မိဘပြည်သူတွေကလည်း ဒီစစ်ကြောင်းထဲမှာ အားဖြည့်လိုက်ပါခဲ့ကြပြီး ဆန္ဒထုတ်ဖော်ခဲ့ကြတယ်လို့ သိရပါတယ်။
လူဦးရေ ရာနဲ့ချီတဲ့ ဒီသပိတ်စစ်ကြောင်းဟာ မန္တလေးမြို့ရဲ့ လမ်းမတွေပေါ်မှာ လက်သုံးချောင်းထောင်ကာ ဆန္ဒထုတ်ဖော်ခဲ့ကြပြီး ဘေးကနေ ဆိုင်ကယ်နဲ့ ဝန်းရံပေးတဲ့သူတွေရှိခဲ့တာကိုလည်း တွေ့ရပါတယ်။
ဒီကနေ့ မန္တလေးမြို့အတွင်းမှာ မဟာတပ်ပေါင်းစု သပိတ်စစ်ကြောင်းတစ်ခုထဲ ထွက်ရှိခဲ့တာမဟုတ်ပဲ ရတနာပုံတက္ကသိုလ် ကျောင်းသား/ ကျောင်းသူများ သပိတ်စစ်ကြောင်းလည်းထွက်ရှိခဲ့သလို အခြားသော ဆန္ဒထုတ်ဖော်မှုတွေလည်း ရှိနေတာကို တွေ့ရပါတယ်။
ဘယ်လောက်ပဲ ဖိနှိပ် ဖြိုခွဲခံရ မလျော့သောဇွဲသတ္တိနဲ့ လမ်းမတွေပေါ်ထွက်ပြီး ဆက်လက်ဆန္ဒထုတ်ဖော်နေကြတဲ့ မန္တလေးမြို့သူ မြို့သားတွေရဲ့ သတ္တိကတော့ လေးစားစရာပါပဲ။